அமரன் திரைப்படத்திற்கு சர்வதேச அங்கீகாரம்
கோவாவில் இன்று தொடங்கி நவம்பர் 28 வரை நடைபெறும் 56வது சர்வதேச திரைப்பட விழா (IFFI) உலகம் முழுவதும் 81 நாடுகளைச் சேர்ந்த 240-க்கும் மேற்பட்ட படங்களை திரையிடுகிறது. இந்த விழாவில் தமிழ்த் திரைப்படமான அமரன் முதன்முதலில் திரையிடப்பட இருப்பது தமிழ் திரையுலகிற்கு ஒரு பெரும் மரியாதையாக கருதப்படுகிறது.
இந்த சிறப்பு திரையிடலுக்காக அமரன் படத்தின் கதாநாயகன் சிவகார்த்திகேயன் இன்று கோவாவிற்கு பயணம் செய்துள்ளார்.
கடந்த ஆண்டின் தீபாவளி வெளியீடாக வந்த அமரன், மறைந்த மேஜர் முகுந்த் வரதராஜனின் வாழ்க்கையை ஆதாரமாகக் கொண்டு உருவாக்கப்பட்டது. முகுந்த் வரதராஜனாக சிவகார்த்திகேயனும், அவரது மனைவி இந்துவாக சாய் பல்லவியும் நடித்தனர். ராஜ்குமார் பெரியசாமி இயக்கிய இந்த படத்தை கமல்ஹாசனின் ராஜ்கமல் பிலிம்ஸ் இன்டர்நேஷனல் நிறுவனம் தயாரித்தது.
உலகளவில் ரூ. 350 கோடிக்கும் மேலான வசூலை பெற்ற அமரன், சிவகார்த்திகேயனின் கரியரில் மிக அதிக வசூல் பெற்ற படமாகவும் திகழ்கிறது. கேரள திரைப்பட விமர்சகர்கள் சங்கத்தின் ‘சிறந்த பிறமொழித் திரைப்படம்’ விருதை வென்றதுடன், இப்போது IFFI விழாவில் வழங்கப்படும் தங்க மயில் விருதிற்கும் பரிந்துரை செய்யப்பட்டுள்ளது.
மேலும், விழாவின் பனோரமா பிரிவில் முதல் படமாக அமரன் திரையிடப்பட உள்ளது. இதன் மூலம் இப்படம் சர்வதேச அளவில் பெரிய அங்கீகாரம் பெற்றிருப்பதாகக் கூறப்படுகிறது.
இந்த முக்கிய அறிவிப்பை ராஜ்கமல் பிலிம்ஸ் இன்டர்நேஷனல் தனது அதிகாரப்பூர்வ எக்ஸ் பக்கத்தில் இன்று வெளியிட்டுள்ளது. இதையடுத்து, நடிகர் சிவகார்த்திகேயன் விழாவில் பங்கேற்க கோவாவுக்கு சென்றுள்ளார்.
