சோகத்தில் முடிந்த இன்ஸ்டா காதல்! காதலன் உயிரிழப்பு, காதலிக்கு தீவிர சிகிச்சை!
இன்ஸ்டாகிராம் மூலம் பழக்கம் ஏற்பட்டு காதலித்து வந்த காதலர்கள், கருத்து வேறுபாட்டால் குளத்தில் விழுந்து தற்கொலைக்கு முயற்சித்த நிலையில், காதலன் நீரில் மூழ்கி உயிரிழந்தார். காதலி மருத்துவமனையில் தீவிர சிகிச்சை பெற்று வருகிறார்.
திருவாரூர் மாவட்டம் மருதப்பட்டினம் பகுதியைச் சேர்ந்த பிரவீன்குமாருக்கு கடந்த இரண்டு வருடங்களுக்கு முன்பு இன்ஸ்டாகிராம் மூலம் கும்பகோணம் பகுதியைச் சேர்ந்த ஜெயஸ்ரீ என்ற பெண்ணுடன் பழக்கம் ஏற்பட்டு இருவரும் காதலித்து வந்துள்ளனர்.
இருவருக்கும் கடந்த சில நாட்களாக மனக்கசப்பு ஏற்பட்ட நிலையில், நேற்று இருவரும் திருவாரூர் மாவட்டம் திருக்கண்ணமங்கை பகுதியில் உள்ள விநாயகர் கோயில் குளம் அருகே சந்தித்து பேசியபோது சண்டை முற்றியதில் பிரவீண்குமார் குளத்தில் குதித்துள்ளார். காதலனை காப்பாற்றுவதற்காக காதலி ஜெயஸ்ரீயும் குளத்தில் குதித்துள்ளார்.
அப்போது அருகில் இருந்தவர்கள் அவர்களின் அலறல் சத்தம் கேட்டு இருவரையும் காப்பாற்றி திருவாரூர் அரசு மருத்துவக்கல்லூரி மருத்துவமனையில் அனுமதித்தனர். ஆனால், பிரவீன்குமார் வழியிலேயே உயிரிழந்த நிலையில் ஜெயஸ்ரீக்கு தீவிர சிகிச்சை அளிக்கப்பட்டு வருகிறது.
இந்த சம்பவம் குறித்து குடவாசல் போலீசார் தற்கொலை வழக்கு பதிவு செய்து விசாரணை மேற்கொண்டு வருகின்றனர் மேலும் பிரேத பரிசோதனைக்காக பிரவீன் குமார் உடலை திருவாரூர் அரசு மருத்துவக் கல்லூரி மருத்துவமனையில் வைத்துள்ளனர். இன்ஸ்டாகிராம் மூலம் பழக்கம் ஏற்பட்டு இருவரும் தற்கொலை முயற்சியில் ஈடுபட்டு காதலன் உயிரிழந்த சம்பவம் அப்பகுதியில் பெரும் சோகத்தை ஏற்படுத்தி உள்ளது. காதல் ஜோடி தற்கொலைக்கு முயன்ற சிசிடிவி காட்சிகள் தற்போது வைரலாக பரவி வருகிறது.
