மயிலாடுதுறையில் அதிர்ச்சி! மூதாட்டியின் கழுத்திலிருந்து செயின் பறிப்பு

மயிலாடுதுறை: மயிலாடுதுறை மாவட்டத்தில் நடந்த தைரியமான செயின் பறிப்பு சம்பவம் அந்தப் பகுதியில் பெரும் பரபரப்பை ஏற்படுத்தியுள்ளது.
மயிலாடுதுறை ஆரோக்கியநாதபுரம் பகுதியில், மாவட்ட காவல் கண்காணிப்பாளர் அலுவலகத்திற்கு 500 மீட்டர் தொலைவில் உள்ள அழகப்பா செட்டித்தெருவை சேர்ந்த 75 வயது மூதாட்டி சுசிலா என்றவர், வழக்கம்போல தெருமுனையிலுள்ள கோவிலுக்கு சென்று வீடு திரும்பி வந்துள்ளார்.

அப்போது, இருசக்கர வாகனத்தில் வந்த மர்ம நபர்களில் ஒருவர், சுசிலாவின் பின்னால் நடந்து வந்து, அவர் கழுத்தில் இருந்த 12 சவரன் தங்கச் செயினை கண்ணிமைக்கும் நேரத்தில் அறுத்து பறித்துச் சென்றுள்ளார்.

சம்பவம் சில விநாடிகளில் நடந்ததால், மூதாட்டி தன்னைக் காப்பாற்ற முடியாமல் அதிர்ச்சியடைந்துள்ளார். செயின் பறிப்பு சம்பவம் குறித்து அருகிலுள்ள பொதுமக்கள் போலீசாருக்கு தகவல் அளித்தனர்.

இந்நிலையில், சம்பவம் இடம்பெற்ற இடத்தில் நிறுவப்பட்டிருந்த சிசிடிவி கேமரா காட்சிகளில், மர்ம நபர் மூதாட்டியை பின்தொடர்ந்து செயின் பறிக்கும் காட்சி பதிவாகியுள்ளன.

இந்தக் காட்சிகள் தற்போது சமூக வலைதளங்களில் வேகமாக பரவி பொதுமக்களிடையே பெரும் அதிர்ச்சியை ஏற்படுத்தியுள்ளது.

மயிலாடுதுறை காவல்துறை சம்பவ இடத்துக்கு விரைந்து சென்று விசாரணை மேற்கொண்டு வருகிறது. மர்ம நபர்களை அடையாளம் காணும் பணியும் தீவிரமாக நடைபெற்று வருகிறது.