புதுவை சபாநாயகருக்கு எதிராக திடீரென போர்க்கொடி தூக்கிய முன்னாள் பாஜக நிர்வாகி!

புதுவை சபாநாயகர் செல்வத்துக்கு எதிராக அவரது ஆதரவாளர் போர்க்கொடி தூக்கி இருப்பது பரபரப்பை ஏற்படுத்தி உள்ளது. பா.ஜ.க. மாநில இளைஞரணி பொருளாளராகவும், அரியாங்குப்பம் மாவட்ட பொருளாளராகவும் இருந்தவர் முருகன். சபாநாயகர் செல்வத்தின் தீவிர ஆதரவாளரான இவர் கடந்த சட்டப்பேரவை தேர்தலில் தேர்தல் பணியாற்றியுள்ளார். இந்நிலையில் தற்போது அவர் சபாநாயகருக்கு எதிராக தனது ஆதரவாளர்களுடன் போர்க்கொடி தூக்கியுள்ளார்.

இது குறித்து அவர் தனது ஆதரவாளர்களுடன் செய்தியாளர்களிடம் பேசிய அவர் “சபாநாயகருக்கு கட்சியில் சேர்ந்த நாளில் இருந்து உண்மையாக உழைத்துள்ளேன். 2021 சட்டப்பேரவைத் தேர்தலில் முழுமையாக பணி செய்தோம். பல உதவிகளையும் செய்துள்ளேன்.

ஆனால் சபாநாயகருக்கு நான் முன்னேறுவது பிடிக்கவில்லை. கடந்த ஆண்டு என்னுடைய பிறந்தநாளுக்கு எனது ஆதரவாளர்கள் பேனர் வைத்தனர். அந்த பேனரில் சபாநாயகரின் படம் இடம்பெறவில்லை. அந்த காழ்புணர்ச்சியின் காரணமாக என்மீது வழக்கு பதிவு செய்யப்பட்டது.

அரசு தொடக்கப்பள்ளியில் ரத்ததான முகாம் நடத்தினேன். அதற்கும் அனுமதி அளிக்காததால் அந்த முகாமையும் நிறுத்திவிட்டேன். இதுபோல் மக்களுக்கு நல்லது செய்ய வேண்டும் என்று பணிகளை செய்தால் தொடர்ந்து தொல்லை கொடுக்கின்றனர். இதனால் நேரடியாகவே களம் இறங்க முடிவு செய்துள்ளேன்.

வரும் 2026 சட்டப்பேரவை தேர்தலில் மணவெளி தொகுதியில் சுயேட்சையாக போட்டியிட இருக்கின்றேன். எனக்கு எந்த கட்சி ஆதரவு அளிக்குமோ, அதுபற்றி எனது ஆதரவாளர்ளோடு கலந்தாலோசனை செய்து முடிவை அறிவிப்பேன். மக்களுக்கு நல்லது செய்ய விடுங்கள். அதனை பதவியின் அதிகாரத்தை கொண்டு தடுக்க வேண்டாம்” என்றார்.