புதுவையில் வெள்ளம் சூழ்ந்ததால் பொதுமக்கள் அவதி!
புதுச்சேரி சோலை நகர் பகுதியில் கழிவுநீர் வாய்க்கால் தூர்வாரப்படாததால் மழைநீர் சாலைகளில் தேங்கி வீடுகளுக்குள் செல்லும் அவல நிலை ஏற்பட்டுள்ளது.
புதுச்சேரி முத்தியால்பேட்டையில் இருந்து சோலை நகர் வழியாக குருச்சிக்குப்பம் பகுதி வரை உள்ள கழிவுநீர் வாய்க்கால் தூர்வாரப்படாததால் கழிவு நீர் வெளியேற முடியாத நிலை ஏற்பட்டுள்ளது. இதனால் பாப்பம்மாள் கோவில் வீதி, எல்லை மாரியம்மன் கோவில் வீதி உள்ளிட்ட பகுதிகளில் மழைநீரோடு கழிவுநீரும் கலந்து குடியிருப்புகளை சூழ்ந்து கொள்வதால் மக்கள் பெரும் சிரமத்திற்கு ஆளாகின்றனர்.
புதுவை அரசு உடனடியாக அந்த வாய்க்காலை தூர் வாரி, சரி செய்து தர வேண்டும் என கடந்த சில தினங்களுக்கு முன்பு அப்பகுதி மக்கள் SS NEWS டிஜிட்டல் வாயிலாக அரசுக்கு கோரிக்கை வைத்தனர்.
இந்த நிலையில், புதுச்சேரி அரசின் அலட்சியப் போக்கால் நேற்று பெய்த தொடர் கனமழையால் அப்பகுதியில் மீண்டும் வெள்ளம் சூழ்ந்தது. கழிவுநீரோடு மழைநீரும் கலந்ததால் அப்பகுதி மக்கள் கடும் சிரமத்திற்குள்ளாகினர்.
இந்த நிலையில் அப்பகுதியை ஆய்வு செய்த மாவட்ட ஆட்சியர் உடனடியாக வாய்க்காலை தூர்வார வேண்டும் என அதிகாரிகளுக்கு உத்தரவிட்டுள்ளார். இந்த நடவடிக்கை தாமதமானது எனவும் இனிமேலாவது துரிதமாக வெள்ளம் வரும் முன்பே வெள்ள தடுப்பு நடவடிக்கைகளை மேற்கொள்ள வேண்டுமென பொதுமக்கள் கருத்து தெரிவித்துள்ளனர்.
