14 ஆண்டுகளாக பேருந்து வசதி இன்றி தவிக்கும் கோர்க்காடு கிராம மக்கள்!
புதுச்சேரி வில்லியனூர் அருகே உள்ள கோர்க்காடு கிராமம் கடந்த 14 ஆண்டுகளாக பேருந்து சேவையின்றி பெரும் இன்னலுக்கு உள்ளாகி வருகின்றனர்.
சுமார் 4,000 குடும்பங்கள் வசிக்கும் இந்த பகுதியில் பள்ளி, கல்லூரி மாணவர்கள் மற்றும் வேலைக்குச் செல்லும் பொதுமக்கள் மூன்று கிலோமீட்டர் தூரம் நடந்து சென்று மட்டுமே பேருந்து சேவையைப் பயன்படுத்த வேண்டிய நிலை தொடர்கிறது.
இரவு நேரங்களில் தெருவிளக்குகள் இல்லாததால், பேருந்திலிருந்து இறங்கி நடந்து செல்லும் மக்கள் நாய்களின் தொல்லையும் சமூகவிரோதிகளின் அச்சுறுத்தல்களும் எதிர்கொள்கின்றனர். இதுகுறித்து பலமுறை அதிகாரிகளுக்கு மனுக்கள் அளித்தும் இதுவரை நடவடிக்கை எடுக்கப்படவில்லை என கிராம மக்கள் குற்றம்சாட்டினர்.
“இந்த நிலை தொடர்ந்தால் அனைவரும் ஒன்றிணைந்து போராட்டத்தில் ஈடுபட வேண்டிய நிலை உருவாகும்,” என ஊர் பொதுமக்கள் எச்சரித்துள்ளனர்.
