கல்லறை திருநாளை முன்னிட்டு புதுச்சேரியில் சுத்தம் மற்றும் அலங்காரப் பணிகள் தீவிரம்!
புதுச்சேரி:
கல்லறை திருநாளை (All Souls Day) முன்னிட்டு கிறிஸ்தவர்களின் நினைவிடங்களில் சுத்தம் செய்தல், வண்ணம் பூசுதல் உள்ளிட்ட பணிகள் தீவிரமாக நடைபெற்று வருகின்றன.
கிறிஸ்தவர்களின் நம்பிக்கையில், மரணம் என்பது முடிவல்ல, புதிய வாழ்வின் தொடக்கம் என்ற எண்ணத்தை நினைவூட்டும் ஒரு நாள் இதுவாகும். ஆண்டுதோறும் நவம்பர் 2ஆம் தேதி கல்லறை திருநாள் அனுசரிக்கப்படுகிறது.
இந்த நாளில், மக்கள் தங்களது முன்னோர்களின் கல்லறைகளுக்கு சென்று மலர்கள், மெழுகுவர்த்திகள் மற்றும் வாசனை திரவியங்களால் அலங்கரித்து, அவர்களின் ஆன்மாக்களுக்காக பிரார்த்தனை செய்வது வழக்கம்.
அந்த வகையில், புதுச்சேரி உப்பளம் உள்ளிட்ட பகுதிகளில் உள்ள கிறிஸ்தவர்கள் தங்களது முன்னோர்கள் அடக்கம் செய்யப்பட்ட நினைவிடங்களை சுத்தம் செய்து புதிய வண்ணங்கள் பூசி புதுப்பித்து வருகின்றனர்.
புதுச்சேரி முழுவதும் மக்கள் பங்கேற்புடன் கல்லறை திருநாளை கோலாகலமாகக் கொண்டாடத் தயாராகி வருகின்றனர்.
