புதுச்சேரி வீட்டிற்குள் ஆறடி சாரைப்பாம்பு புகுந்த பரபரப்பு – வனத்துறை ஊழியர்கள் அரைமணி போராட்டத்தில் பிடிப்பு
புதுச்சேரி உழவர்கரை தொகுதி சுதாகர் நகரில் உள்ள ஒரு வீட்டில் திடீரென ஆறடி நீளமான சாரைப்பாம்பு நுழைந்ததால் அந்தப்பகுதியில் பரபரப்பு ஏற்பட்டது.
சுமார் 200க்கும் மேற்பட்ட குடும்பங்கள் வசிக்கும் இந்தப் பகுதியில், நேற்று இரவு லேசான மழை தொடர்ந்து பெய்து வந்தது. இதன்போது, தனியார் நிறுவனத்தில் பணிபுரியும் ஒருவர் குடும்பத்துடன் வீட்டில் சோபாவில் அமர்ந்து உணவு அருந்திக் கொண்டிருந்தார். அப்போது திடீரென ஆறடி நீள சாரைப்பாம்பு வீட்டுக்குள் விரைவாக நுழைந்தது.
பாம்பை கண்டு அதிர்ச்சியடைந்த குடும்பத்தினர் அலறியடித்து வெளியே ஓடினர். பின்னர் பாம்பு வீட்டின் சோபா மற்றும் நாற்காலிக்கு அடியில் பதுங்கிக் கொண்டது. உடனே வீட்டின் உரிமையாளர் வனத்துறைக்கு தகவல் தெரிவித்தார்.
தகவல் கிடைத்ததும் சம்பவ இடத்திற்கு வந்த வனத்துறை ஊழியர்கள், சுமார் அரை மணி நேரம் முயற்சித்துப் போராடி, நாற்காலிக்குக் கீழே பதுங்கியிருந்த சாரைப்பாம்பை பாதுகாப்பாக பிடித்து எடுத்துச் சென்றனர்.
இந்த சம்பவம் காரணமாக அந்தப் பகுதியில் பரபரப்பு நிலவியது. மேலும், சுதாகர் நகரில் புதர்கள் அதிகமாகக் கிடப்பதால் அடிக்கடி பாம்புகள் மற்றும் விஷ பூச்சிகள் வருவதாகவும், அவற்றை உடனடியாக அகற்ற நடவடிக்கை எடுக்க வேண்டும் எனவும் உள்ளூர் மக்கள் கோரிக்கை விடுத்துள்ளனர்.
