ஆன்லைன் வேலைவாய்ப்பு மோசடி – ஏமாற்றத்தால் மனவேதனையில் இளம்பெண் உயிரிழப்பு

உத்தரப் பிரதேசம் ஜான்சியில் ஆன்லைன் வேலைவாய்ப்பு மோசடியில் சிக்கிய இளம்பெண் தற்கொலை செய்துகொண்ட சம்பவம் பெரும் அதிர்ச்சியை ஏற்படுத்தியுள்ளது.

சில நாட்களுக்கு முன்பு ஜான்சி மாவட்டம் பெத்வா நதிக்கரையில் ஒரு பெண்ணின் உடல் மிதந்த நிலையில் கண்டெடுக்கப்பட்டது. விசாரணையில், அந்த பெண் 21 வயதான பாவ்னா பால் என அடையாளம் காணப்பட்டார். அவர் காணாமல் போனதாக அவரது கணவர் ஷேர் சிங் முன்பு புகார் அளித்திருந்தார்.

சிசிடிவி காட்சிகள் மூலம் பாவ்னா கோவிலுக்குச் சென்ற வழி கண்காணிக்கப்பட்டு, இறுதியாக ஆற்றங்கரையில் அவரது உடல் மீட்கப்பட்டது. ஆரம்ப விசாரணையில், அவர் கடுமையான மன அழுத்தத்தால் தற்கொலை செய்துகொண்டது உறுதியாகியுள்ளது.

பாவ்னா வீட்டிலிருந்தே வேலை செய்யும் வாய்ப்புகளைத் தேடி வந்தபோது, “பென்சில் நிறுவனத்தில் பேக்கேஜிங் வேலை — அதிக ஊதியம், வீட்டிலிருந்தே வேலை” என்ற ஆன்லைன் விளம்பரத்தை பார்த்தார். அதில் சேர்வதற்காக ரூ.35,000 பணம் செலுத்தும்படி கேட்டனர். நம்பிக்கையுடன் அவர் பணத்தை அனுப்பிய பிறகு, அந்த நபர்கள் தொடர்பு கொள்ளாமல் மறைந்துவிட்டனர். தொலைபேசி எண்களும் செயலிழந்த நிலையில் இருந்தது. பின்னர் தான் அது ஒரு மோசடி என அவருக்கு தெரியவந்தது.

பணத்தையும் நம்பிக்கையையும் இழந்த பாவ்னா கடும் மனவேதனையால் உயிரை மாய்த்துக்கொண்டார் என்று காவல்துறை தெரிவித்துள்ளது.

2023ல் திருமணம் செய்துகொண்ட பாவ்னாவுக்கு ஒரு வயது மகன் உள்ளார். தாயை இழந்த குழந்தை தற்போது உறவினருடன் தங்கியிருக்கிறது. இச்சம்பவம் ஜான்சி மாவட்டத்தையே உலுக்கியுள்ளது.

இதுபோன்ற மோசடிகளில் சிக்கினால், தற்கொலை போன்ற தவறான முடிவுகளை எடுக்காமல் உடனடியாக சைபர் குற்றப்பிரிவில் புகார் அளிக்கவும். நேரத்தில் நடவடிக்கை எடுத்தால், பணத்தை மீட்கவும், பிறர் இதே வலையில் சிக்காமல் தடுக்கவும் முடியும்.