‘டியூட்’ படத்தில் இளையராஜா பாடல்கள் – நீக்க கோரிக்கை நிராகரிப்பு: உயர் நீதிமன்றத்தில் விசாரணை
இயக்குநர் கீர்த்தீஸ்வரன் இயக்கத்தில், நடிகர் பிரதீப் ரங்கநாதன் நடிப்பில் தீபாவளிக்கு வெளியான ‘டியூட்’ திரைப்படத்தில், ‘புது நெல்லு புது நாத்து’ படத்தின் ‘கருத்த மச்சான்’ பாடலும், ‘பணக்காரன்’ படத்தின் ‘100 வருஷம் இந்த மாப்பிள்ளையும்’ பாடலும் பயன்படுத்தப்பட்டிருந்தன. இந்த பாடல்கள் தனது அனுமதியின்றி பயன்படுத்தப்பட்டதாக இசையமைப்பாளர் இளையராஜா சென்னை உயர்நீதிமன்றத்தில் வழக்கு தொடர்ந்தார்.
வழக்கு விசாரணையில், நீதிபதி என். செந்தில்குமார்,“30 ஆண்டுகளுக்கு முன் வெளியான இந்த பாடல்களை இன்று மக்கள் ரசிக்கிறார்கள். இதனால் இளையராஜாவுக்கு எப்படி பாதிப்பு ஏற்படுகிறது? பழைய பாடல்களை ரீயூஸ் செய்வது தற்போது டிரெண்ட்” என்று குறிப்பிட்டார்.
இதற்கு பதிலளித்த இளையராஜா தரப்பு,“பாடல்களின் பதிப்புரிமை இளையராஜாவுக்கே சொந்தம். அனுமதி இல்லாமல் பயன்படுத்தப்பட்டுள்ளதால் பாடல்களை நீக்க உத்தரவு வழங்க வேண்டும்” என்று வாதிட்டது.
தயாரிப்பு நிறுவனம் மைத்திரி மூவி மேக்கர்ஸ் சார்பில்,“பாடல்களின் உரிமை எக்கோ நிறுவனத்திடமிருந்து சோனி நிறுவனம் பெற்றுள்ளது. சோனி நிறுவனத்திடம் இருந்து பயன்படுத்த அனுமதி பெற்றுள்ளோம்” என்று தெரிவித்தது.
இளையராஜா தரப்பு,“ஏற்கெனவே எக்கோ நிறுவனத்தை இரண்டு நீதிபதிகள் அமர்வு தடை செய்துள்ளது,” என்று வாதித்ததும், நீதிபதி, “படம் திரையரங்கிலும் OTT-யிலும் வெளியாகும் வரை அமைதியாக இருந்துவிட்டு இப்போது வழக்கு தாக்கல் செய்ததற்கு என்ன காரணம்?” என்று கேட்டார்.
இளையராஜா தரப்பு,“தயாரிப்பாளருக்கு நோட்டீஸ் அனுப்பியபோது, ‘இத்தகைய நபர் இல்லை’ என்று திருப்பிவிட்டனர்,”என்று விளக்கம் அளித்தது.
பின்னர் இன்று வந்த தீர்ப்பில்,‘டியூட்’ படத்தில் பயன்படுத்தப்பட்டுள்ள இளையராஜாவின் பாடல்களை நீக்க உயர்நீதிமன்றம் உத்தரவிட்டது.
மேலும், பாடல்களை நீக்க 7 நாட்கள் அவகாசம் வழங்க வேண்டும் என்ற தயாரிப்பு நிறுவன கோரிக்கை நீதிமன்றத்தால் நிராகரிக்கப்பட்டது.
