கரூர் கூட்ட நெரிசல் வழக்கு: சாட்சிகளிடம் தொடர்ந்து விசாரணை நடத்தும் சிபிஐ அதிகாரிகள்

கரூர்:

நடிகர் விஜயின் மக்கள் சந்திப்பு பரப்புரையின் போது வேலுச்சாமி புரத்தில் ஏற்பட்ட கூட்ட நெரிசலில் 41 பேர் உயிரிழந்த அதிர்ச்சிச் சம்பவம் தொடர்பாக சிபிஐ அதிகாரிகள் தீவிர விசாரணை மேற்கொண்டு வருகின்றனர்.
நீதிமன்ற உத்தரவின் பேரில் விசாரணை தொடங்கிய சிபிஐ, இதுவரை சம்பந்தப்பட்ட பல்வேறு சாட்சிகள் மற்றும் நிகழ்வில் ஈடுபட்டவர்களிடம் தொடர்ந்து தகவல் சேகரித்து வருகிறது.

இந்நிலையில், கரூர் கூட்ட நெரிசல் வழக்கு தொடர்பாக சாட்சிகளிடம் விசாரணை நடத்துவதற்காக நூற்றுக்கும் மேற்பட்டோருக்கு சிபிஐ சம்மன் அனுப்பியுள்ளது. கரூர் சுற்றுலா மாளிகையில் தங்கி இருக்கும் சிபிஐ அதிகாரிகள் முன்னிலையில் இதுவரை 15க்கும் மேற்பட்டோர் ஆஜராகியுள்ளனர்.

இன்று வேலுச்சாமி புரம் பகுதியில் கடைகள் நடத்தி வந்த வியாபாரிகள் 5 பேர் சிபிஐ விசாரணைக்கு ஆஜராகியுள்ளனர். கூட்ட நெரிசல் ஏற்பட்ட நாள் மற்றும் நிகழ்வுகளின் துல்லியமான விவரங்களை அறிந்து கொள்ள சிபிஐ அதிகாரிகள் அவர்கள் வழங்கிய சாட்சிகளை பதிவு செய்துள்ளனர்.

விசாரணை அடுத்த சில நாட்களும் தொடரும் எனவும், சம்பவத்தின் பின்னணி மற்றும் பொறுப்புடையவர்களை கண்டறிய சிபிஐ தீவிரமாக நடவடிக்கை எடுத்து வருவதாகவும் தகவல்கள் தெரிவிக்கின்றன.