சுற்றுலா பயணிகளுக்கு அதிர்ச்சி: இனி வால்பாறைக்கும் இ-பாஸ் கட்டாயம்

ஊட்டி மற்றும் கொடைக்கானல் போலவே வால்பாறைக்கும் இனி இ-பாஸ் கட்டாயம் என்ற அதிரடி உத்தரவு அமலுக்கு வரவுள்ளது. சமீப காலமாக வால்பாறை சுற்றுலாத் தலத்தில் சுற்றுலா பயணிகள் பெருமளவில் வருகை தருவதால், இந்த நடவடிக்கை எடுக்கப்பட்டுள்ளதாக தகவல்.

விடுமுறை நாட்களில் சுற்றுலா தலங்களில் மக்கள் கூட்டம் அதிகரித்து, போக்குவரத்து நெரிசல் அதிகம் காணப்படுகின்றது. இதை கட்டுப்படுத்தும் நோக்கில், ஊட்டி மற்றும் கொடைக்கானலில் எத்தனை வாகனங்களை அனுமதிக்கலாம் என்பதற்காக சென்னை ஐஐடி மற்றும் பெங்களூரு ஐஐஎம் நிறுவனங்கள் ஆய்வு மேற்கொண்டு வருகின்றன.

இந்த வழக்கு நீதிபதிகள் சதீஷ்குமார் மற்றும் பரத் சக்கரவர்த்தி தலைமையிலான அமர்வில் விசாரணைக்கு வந்தது. அப்போது, ஐஐடி மற்றும் ஐஐஎம் குழுவினர் தங்களது இடைக்கால அறிக்கையை தாக்கல் செய்தனர்.

அந்த அறிக்கையில், ஊட்டிக்கு செல்லும் தனியார் வாகனங்களின் எண்ணிக்கையை குறைத்து, அரசு போக்குவரத்தைப் பயன்படுத்த ஊக்குவிக்க வேண்டும் என பரிந்துரைகள் இடம் பெற்றுள்ளன. மேலும், இறுதி அறிக்கை டிசம்பர் மாதத்தில் தாக்கல் செய்யப்படும் என குழுவினர் தெரிவித்துள்ளனர்.

இதனை தொடர்ந்து, குழுவிற்கு தேவையான தகவல்களையும் ஆலோசனைகளையும் வழங்க தலைமைச் செயலாளர் தலைமையில் விரைவில் கூட்டம் நடத்த வேண்டும் என நீதிபதிகள் உத்தரவிட்டனர். இந்த வழக்கு அக்டோபர் 31ஆம் தேதிக்கு ஒத்திவைக்கப்பட்டது.