தஞ்சையில் குருவை நெல் கொள்முதல் உற்சாகமாக நடைபெற்று வருகிறது!

தஞ்சை மாவட்டத்தில் குருவை நெல் சாகுபடி கொள்முதல் பருவம் சுமார் இரண்டு மாதங்களுக்கு முன்பு தொடங்கப்பட்டது. இதனைத் தொடர்ந்து, மாவட்டம் முழுவதும் 352 நேரடி நெல் கொள்முதல் நிலையங்கள் திறக்கப்பட்டுள்ளன. தற்போது அதில் 291 நிலையங்கள் செயல்பாட்டில் இருந்து, நெல் கொள்முதல் பணிகள் சிறப்பாக நடைபெற்று வருகின்றன.

கொள்முதல் நிலையங்களில் நெல் வாங்குவதற்கான தேவையாக 8,06,563 சாக்குகள் இருப்பில் உள்ளன. அதே நேரத்தில், சேமிப்புக்கிடங்குகளில் 12,73,628 சாக்குகள் வைக்கப்பட்டுள்ளன.

மேலும், கொல்கத்தா சனல் ஆலை வழியாக, மேற்குவங்க மாநிலம் பத்ரேஸ்வர் ரயில் நிலையத்திலிருந்து தஞ்சாவூர் ரயில் நிலையத்திற்கு சரக்கு ரயில் மூலம் சாக்குகள் அனுப்பப்பட்டன. மொத்தம் 42 பெட்டிகளில் 5,460 பண்டல்கள் வந்தடைந்துள்ளன. ஒவ்வொரு பண்டலிலும் 500 சாக்குகள் என கணக்கிடப்பட்டுள்ளதால், மொத்தம் 27,30,000 சாக்குகள் தற்போது தஞ்சாவூருக்கு வந்தடைந்துள்ளன.

இந்த சாக்குகள் அனைத்தும் லாரிகள் மூலம் தஞ்சை மாவட்டத்தில் உள்ள 300 நேரடி நெல் கொள்முதல் நிலையங்களுக்கு அனுப்பி வைக்கப்பட்டுள்ளன. இதன் மூலம், கொள்முதல் பணிகள் தடையின்றி நடைபெற தேவையான பொருட்கள் முழுமையாக ஏற்பாடு செய்யப்பட்டுள்ளதாக அதிகாரிகள் தெரிவித்துள்ளனர்.

தற்போது மாவட்டம் முழுவதும் நெல் கொள்முதல் வேகமாக நடைபெற்று வருவதால், விவசாயிகள் உற்சாகமடைந்துள்ளனர்.