மதுரையில் வைகை ஆற்றில் கல்லூரி மாணவர் நீரில் மூழ்கி மாயம்

மதுரை:
மதுரை சமயநல்லூர் அருகே வைகை ஆற்றில் குளிக்கச் சென்ற கல்லூரி மாணவர் நீரில் மூழ்கி மாயமானதால் பரபரப்பு ஏற்பட்டுள்ளது.

பரவை அருகே சத்தியமூர்த்தி நகரைச் சேர்ந்த ராஜா என்பவருக்கு மூன்று குழந்தைகள் உள்ளனர். அவரது இரண்டாவது மகன் சந்தோஷ் (18) கல்லூரி மாணவர் ஆவார். அவர் தந்தையுடன் சேர்ந்து டாடா ஏஸ் வாகனத்தை கழுவுவதற்காக வைகை ஆற்றிற்கு சென்றிருந்தார்.

வாகனத்தை கழுவிய பிறகு, சந்தோஷ் தனியாக ஆற்றில் குளிக்கச் சென்றார். அப்போது அருகில் இருந்தவர்கள் “நீரின் ஓட்டம் அதிகம்” என்று எச்சரித்தும், அதை அலட்சியமாக எடுத்துக்கொண்டதாக கூறப்படுகிறது.

பின்னர் நீச்சல் தெரியாத சந்தோஷ் சுழல் பகுதியில் சிக்கி நீரில் மூழ்கி மாயமானார். அருகில் இருந்தவர்கள் மீட்க முயன்றும் முடியாமல் போனது.

இதனைத் தொடர்ந்து தகவல் அறிந்து சமயநல்லூர் காவல்துறை மற்றும் சோழவந்தான் தீயணைப்பு துறை சம்பவ இடத்திற்கு விரைந்து வந்து, வைகை ஆற்றில் 6 மணி நேரமாக தீவிர தேடுதல் பணியில் ஈடுபட்டு வருகின்றனர்.

அதே நேரத்தில், அரசு வைகை ஆற்றில் நீர் வெளியேற்றம் அதிகரித்துள்ளதாக முன்கூட்டியே எச்சரித்திருந்த நிலையில், இளைஞர்களின் அலட்சியம் இவ்விபத்துக்கு காரணமாகி உள்ளது எனக் கூறப்படுகிறது.

நீரில் மாயமான சந்தோஷின் தாய் மற்றும் சகோதரி துயரத்தில் அழுத காட்சிகள், அப்பகுதியை சோகத்தில் ஆழ்த்தியுள்ளது.