வாடிப்பட்டி அருகே சாலையில் நெல் குவியல்கள் – அரசு கொள்முதல் நிலைய தாமதத்தால் விவசாயிகள் வேதனை

மதுரை:
மதுரை மாவட்டம் வாடிப்பட்டி அருகே நெல் அறுவடை செய்யப்பட்டு கொள்முதல் நிலையத்தில் சேர்க்க முடியாத நிலையில், சாலையோரம் நெல் மூட்டைகள் குவிந்து கிடப்பதால் விவசாயிகள் கடும் அவதியில் உள்ளனர்.

வாடிப்பட்டி அருகிலுள்ள தனிச்சியம் கிராமம் மற்றும் அதன் சுற்றுவட்டாரப் பகுதிகளில் நெல் அறுவடை பூர்த்தியடைந்த நிலையில், அந்தப் பகுதியில் தற்காலிக அரசு நெல் கொள்முதல் நிலையம் செயல்பட்டு வருகிறது.

தனிச்சியம், கொண்டயம்பட்டி, செம்புகுடிப்பட்டி உள்ளிட்ட கிராமங்களில் இருந்து 800 ஏக்கருக்கு மேற்பட்ட நெல் அரசு கொள்முதல் நிலையத்துக்குக் கொண்டு வரப்பட்டுள்ளது. ஆனால், கொள்முதல் நிலையத்தில் போதிய இட வசதி இல்லாததால், வாகனங்களில் கொண்டு வந்த நெல்மணிகள் மதுரை–திண்டுக்கல் தேசிய நெடுஞ்சாலை புறவழிச்சாலையின் இருபுறமும் குவியலாக தேங்கி உள்ளன.

மேலும், ஏற்கனவே கொள்முதல் செய்யப்பட்ட நெல் மூட்டைகளும் சாலையிலேயே குவிந்து இருப்பது போக்குவரத்திற்கும் இடையூறு ஏற்படுத்தி வருகிறது.

விவசாயிகள் தெரிவித்ததாவது:

“அரசு கொள்முதல் நிலையத்தில் நெல் வாங்கும் பணிகள் மிகவும் மந்தமாக நடக்கின்றன. இடைத்தரகர்கள் மற்றும் சில அதிகாரிகள் விவசாயிகளிடம் இருந்து ஒரு மூட்டைக்கு ரூ.55 வரை வசூல் செய்கிறார்கள். ஏற்கனவே விவசாயம் செய்வதே போராட்டமாக இருக்கிறது. இப்போது இப்படிப்பட்ட ஊழல் நடவடிக்கைகள் விவசாயிகளை மேலும் சிரமப்படுத்துகிறது,” என தெரிவித்தனர்.

அத்துடன், கொள்முதல் நிலையம் அமைக்கும்முன் போதிய நிலப்பரப்பு, சேமிப்பு வசதி குறித்து அரசு சரியான ஆய்வு செய்யவில்லை என்பதும் விவசாயிகள் குற்றச்சாட்டு. இதன் காரணமாக, தற்போது சாலையோரம் நெல் குவியல்கள் தேங்கி விபத்து அபாயம் நிலவுகிறது.

விவசாயிகள், ஒரு மூட்டைக்கு ரூ.55 வசூல் செய்கிற அதிகாரிகள் மற்றும் இடைத்தரகர்கள் மீது மாவட்ட நிர்வாகம் உடனடியாக நடவடிக்கை எடுக்க வேண்டும் எனக் கோரிக்கை விடுத்துள்ளனர்.