சம்பளம் வழங்காததால் பாசிக் அலுவலகக் கார் ஏலம் – நீதிமன்ற உத்தரவு!
புதுச்சேரி:
சம்பளம் வழங்காத விவகாரத்தில், புதுச்சேரி பாசிக் (PASIC) அலுவலகத்தின் காரை ஏலம் விட நீதிமன்றம் உத்தரவிட்டுள்ளது.
புதுச்சேரி தட்டாஞ்சாவடி ஒழுங்குமுறை விற்பனைக்கூடம் அருகே பாசிக் தலைமை அலுவலகம் அமைந்துள்ளது. 2017–2018 ஆண்டுகளில், தனியார் செக்யூரிட்டி நிறுவனத்தைச் சேர்ந்த பாதுகாப்பு பணியாளர்கள் அங்கே பணியாற்றினர். ஆனால், அவர்களுக்கு சம்பளம் வழங்கப்படாமல், மொத்தம் ரூ. 27.33 லட்சம் நிலுவையில் இருந்ததாக தெரிவிக்கப்பட்டது.
இதையடுத்து, அந்த நிறுவனத்தின் பொது மேலாளர் புதுச்சேரி மாவட்ட நீதிமன்றத்தில் வழக்கு தொடர்ந்தார். வழக்கை விசாரித்த நீதிமன்றம், ஆறு சதவீத வட்டியுடன், வழக்கு செலவுகளும் சேர்த்து தொகையை பாசிக் நிர்வாகம் செலுத்த வேண்டும் என உத்தரவிட்டது.
ஆனால், சம்பளத் தொகை செலுத்தப்படாததால், நிறைவேற்றல் மனு தாக்கல் செய்யப்பட்டது. மனுவை விசாரித்த நீதிபதி, முதலில் பாசிக் நிர்வாகத்துக்கு நோட்டீஸ் அனுப்ப உத்தரவிட்டார். அதன்பின்னரும் பணம் செலுத்தப்படாததால், நீதிமன்றம் பாசிக் அலுவலகக் காரை ஏலம் விட உத்தரவிட்டது.
நீதிமன்ற ஊழியர்கள் தற்போது அந்த ஏல நோட்டீஸை பாசிக் அலுவலகத்தில் ஒட்டியுள்ளனர். ஏலம் விடப்படும் காரின் மதிப்பு ரூ. 8 லட்சம் எனவும், வரும் 4ஆம் தேதி ஏலம் நடைபெறும் என்றும் தகவல்கள் தெரிவிக்கின்றன.
