படகு சவாரி நிறுத்தப்பட்டுள்ளதால் சுற்றுலா பயணிகள் ஏமாற்றம்!
அரியாங்குப்பம் அடுத்த நோணாங்குப்பம் சுண்ணாம்பாற்றில் நீர்வரத்து அதிகரித்துள்ளதால் படகு சவாரி நிறுத்தப்பட்டுள்ளதால் சுற்றுலா பயணிகள் ஏமாற்றம் அடைந்துள்ளனர்.
புதுச்சேரி அடுத்த நோணாங்குப்பம் சுண்ணாம்பாற்றில் புதுச்சேரி அரசு சுற்றுலா வளர்ச்சி கழகம் சார்பில் படகு குழாம் செயல்பட்டு வருகிறது. இங்கு வரும் சுற்றுலா பயணிகள் சுண்ணாம்பாற்றில் பல்வேறு வகையான படகுகளில் பயணம் செய்து பேரடைஸ் பீச்சுக்குசென்று ஆனந்தமாக மகிழ்ந்து மீண்டும் படகில் படகு குழாமுக்கு வருவது வழக்கம்.
இதனால் வாரந்தோறும் சனி, ஞாயிறு மட்டுமின்றி தொடர் விடுமுறை தினங்களிலும் சுற்றுலா பயணிகளின் கூட்டம் அதிகரித்து காணப்படும். இந்நிலையில் தமிழகம், புதுச்சேரியில் பருவமழை தொடங்கியுள்ள நிலையில் கடந்த 3 தினங்களுக்கு முன்பு கனமழை கொட்டி தீர்த்தது.
இதன் காரணமாகவும், வீடூர் அணை திறப்பினாலும் சங்கராபரணி ஆற்றில் நீர்வரத்து அதிகரித்துள்ளது. இதனால் நோணாங்குப்பம் சுண்ணாம்பாற்றின் படுகை அணை நிரம்பி வழிவதோடு, கடலை நோக்கி தண்ணீர் ஆர்பரித்து செல்கிறது. அதில் ஆகாயத்தாமரை செடிகளும் அடித்துச் செல்லப்படுகிறது.
எனவே சுற்றுலா பயணிகளின் பாதுகாப்பு கருதி நோணாங்குப்பம் படகு குழாமில் படகு சவாரி நிறுத்தப்பட்டு, படகுகள் கரைகளில் பாதுகாப்பாக நிறுத்தி வைக்கப்பட்டுள்ளது.
மேலும் அருகிலுள்ள தனியார் படகு குழாமிலும் படகு போக்குவது நிறுத்தப்பட்டுள்ளது.
தற்காலிகமாக படகு குழாம் நேற்று அரசு அனுமதியோடு மூடப்பட்டுள்ளதுபடகு குழாம் மூடப்பட்டது தெரியாமல் பல்வேறு பகுதிகளில் இருந்து வந்த சுற்றுலா பயணிகள் ஏமாற்றத்துடன் திரும்பி சென்றனர். அரசுக்கும் வருவாய் இழப்பு ஏற்பட்டுள்ளது.
