புதுச்சேரி அரசு மருத்துவமனை – கொசு உற்பத்தி மையமாக மாறியதா? பொதுமக்கள் அதிருப்தி!
புதுச்சேரி கதிர்காமம் அரசு மருத்துவமனை மற்றும் இந்திரா காந்தி மருத்துவக் கல்லூரி சுற்றுப்புறம் தற்போது கொசு உற்பத்தி மையமாக மாறி வருவதாக பொதுமக்கள் குற்றம் சாட்டுகின்றனர்.
மருத்துவமனைக்கு எதிரே அமைந்துள்ள நீர்நிலைத் தொட்டிகள் சரிவர பராமரிக்கப்படாததால், அதில் கழிவுநீர் தேங்கி நிற்கிறது. இதனால், கொசுக்கள் பெருகி டெங்கு, மலேரியா போன்ற நோய்கள் பரவும் அபாயம் ஏற்பட்டுள்ளது.
சுகாதாரத்துறை டெங்கு மற்றும் மலேரியா ஒழிப்பு பிரச்சாரங்களை பெயரளவில் மட்டுமே மேற்கொள்கிறது என்ற குற்றச்சாட்டு எழுந்துள்ளது.
பொதுமக்களின் கூற்றுப்படி, சிகிச்சைக்காக மருத்துவமனைக்கு வரும் நோயாளிகள், சுற்றுப்புற சுத்தமின்மையால் மேலும் நோய்களைப் பெறும் சூழல் ஏற்பட்டுள்ளது.
“மருத்துவமனை நோய்களை குணப்படுத்தும் இடமா அல்லது நோயை பரப்பும் இடமா?” என்ற கேள்வி சமூக வலைதளங்களில் பரவி வருகிறது.
அரசு இந்திரா காந்தி மருத்துவக் கல்லூரியில் தினமும் நூற்றுக்கணக்கான மாணவர்கள், மருத்துவ பணியாளர்கள் மற்றும் பொதுமக்கள் வருகை தருகின்றனர். கல்லூரி செல்லும் வழியிலேயே நீர்நிலைத் தொட்டிகளில் தேங்கியுள்ள கழிவுநீர், கொசுக்களின் பெருக்கத்திற்கு வழிவகுக்கிறது.
இது குறித்து பொதுமக்கள் தெரிவித்ததாவது:
“இந்த தொட்டிகளை உடனடியாக சுத்தம் செய்ய அரசு நடவடிக்கை எடுக்க வேண்டும். இல்லையெனில் டெங்கு மற்றும் மலேரியா பரவல் கட்டுக்குள் வராது.”
மருத்துவமனை மற்றும் கல்லூரி வளாகம் சுத்தமாக பராமரிக்கப்பட வேண்டும்.
நீர்நிலைத் தொட்டிகளை அடிக்கடி சுத்தம் செய்யும் திட்டமிட்ட நடவடிக்கைகளை சுகாதாரத்துறை உடனடியாக மேற்கொள்ள வேண்டும் என பொதுமக்கள் வலியுறுத்துகின்றனர்.
