பேனர்கள் வைத்தால் நடவடிக்கை எடுக்கப்படும்! – உழவர்கரை நகராட்சி ஆணையர் எச்சரிக்கை!
திறந்தவெளியில் அனுமதியில்லாத பேனர்களால் ஆபத்து ஏற்படும்பட்சத்தில் சம்மந்தப்பட்டவர் மீது குற்றவியல் நடவடிக்கை எடுக்கப்படும் என உழவர்கரை நகராட்சி ஆணையர் சுரேஷ்ராஜ் எச்சரித்துள்ளார். இது குறித்து அவர் வெளியிட்டுள்ள செய்திக்குறிப்பில் – உழவர்கரை நகராட்சி வெளிப்புற ஊடக சாதனம் துணை விதிகள்படி உழவர்கரை நகராட்சிக்குட்பட்ட பகுதிகளில் பேனர் விளம்பரம் வைப்பதற்கு உரிய அனுமதி பெற்று வைக்கப்பட வேண்டும். மேலும் அனுமதி பெறாமல் வைக்கப்படும் பேனர்களை அப்புறப்படுத்தவும் மற்றும் அதனை வைப்பவர்கள் மீது அபராதம் விதிக்கவும் வழிவகை உள்ளது.
எதிர்வரும் வடகிழக்கு பருவமழை காலத்தில், காற்றின் வேகம் அதிகரிக் கும் என்பதால் வெளிப்புறத்தில் பேனர் வைப்பது பொதுமக்களுக்கு ஆபத்தை விளைவிக்கக்கூடும்.
எனவே அனுமதியில்லாமல் பேனர் வைக்க வேண்டாம் என எச்சரிக்கப்படுகிறது. இவ்வாறு அனுமதி பெறாமல் வைக்கப்படும் பேனர்களால் ஆபத்து ஏற்படுத்தும் பட்சத்தில், அந்த பேனர் வைத்தவர் மீதும் அதனை பிரின்ட் செய்தவர் மற்றும் அதனை தற்காலிக கட்டுமானம் செய்த ஒப்பந்ததாரர் என அனைவர் மீதும் குற்றவியல் நடவடிக்கை எடுக்கப்படும். எனவே, திறந்த வெளியில் அனுமதியில்லாமல் பேனர் வைக்கக்கூடாது என எச்சரிக்கப்படுகிறது.
மேலும் கட்டிடத்தின் மீது விளம்பர பதாகைகள் வைத்திருக்கும் நிறுவனங்கள் அதன் ஸ்திரத்தன்மை சான்றிதழ் வைத்திருக்க வேண்டும். மேலும் புயல் எச்சரிக்கை காலங்களில் விளம்பர பதாகைகள் வைக் காமல் பார்த்துக்கொள்ள வேண்டுமென எச்சரிக்கப்படுகிறது. இவ்வாறு அதில் தெரிவிக்கப்பட்டுள்ளது.
