வில்லியனூரில் JCM மக்கள் மன்ற அலுவலகத்தை திறந்து வைத்த சமூக சேவகர் சார்லஸ் மார்டின்

புதுச்சேரி:
வில்லியனூர் பகுதியில் JCM மக்கள் மன்ற அலுவலகம் திறப்பு விழா இன்று சமூக சேவகர் சார்லஸ் மார்டின் அவர்களின் தலைமையில் நடைபெற்றது.

வில்லியனூர் புறவழிச்சாலையில் சமூக சேவகர் சார்லஸ் மார்டினை வரவேற்க மக்கள் பட்டாசு வெடித்து உற்சாகமாக வரவேற்பு அளித்தனர். பின்னர், வில்லியனூர் JCM மக்கள் மன்ற தலைவர் பூக்கடை ரமேஷ் தலைமையில் 500க்கும் மேற்பட்டோர் இருசக்கர வாகனங்களில் பேரணியாக இணைந்து, சார்லஸ் மார்டினை மக்கள் மன்ற அலுவலகத்திற்குக் கொண்டுசென்றனர்.

அதன் பிறகு நடைபெற்ற பொதுக்கூட்டத்தில் சமூக சேவகர் சார்லஸ் மார்டின் பேசுகையில்,

“எனது அரசியல் வருகை என்பது பணம் சம்பாதிக்க அல்ல. மக்கள் நலனுக்காக சேவை செய்வதே என் நோக்கம். சிறுவயதிலிருந்தே காசு பணத்தின் மதிப்பை பார்த்தவன் நான். மக்களுக்கு நல்லது செய்ய வேண்டும் என்ற எண்ணம் மட்டுமே எனக்குள்ளது,” என தெரிவித்தார்.

அவர் மேலும் கூறியதாவது:

“வெளிநாடுகளை ஒப்பிடும் போது நம் நாடும் அதுபோல் முன்னேற வேண்டும். பல நாடுகளுக்கு முன்மாதிரியாக இருந்த நம் நாட்டை உருவாக்கிய முன்னோர்களின் தியாகத்தை மறக்கக் கூடாது. புதுச்சேரியில் வேலைவாய்ப்பின்மை, பாதுகாப்பின்மை போன்ற பல பிரச்சினைகள் நிலவுகின்றன. ஒரு மாற்றம் தேவை என்பதற்காகவே உங்களை நம்பி நான் வந்துள்ளேன். மக்கள் வாழ்வாதாரத்தை உயர்த்துவது தான் என் ஒரே குறிக்கோள்,” என்றார்.