ஆங்கில எழுத்துகளை அகற்ற கோரி தமிழ் உரிமை இயக்கம் ஆர்ப்பாட்டம்.

புதுச்சேரியில் புதிதாக இயக்கப்பட்ட மினி மின்சார பேருந்துகளில் ஆங்கிலத்தில்  எழுதப்பட்டுள்ள பெயர்கள் மற்றும் பாதை விவரங்களை அகற்ற வேண்டும் என தமிழ் உரிமை இயக்கம் சார்பில் நடத்தப்பட்ட போராட்டத்தின் போது பரபரப்பு நிலவியது.

பொதுமக்கள் பயன்பாட்டிற்காக புதுச்சேரி சாலை போக்குவரத்து கழகம் 25 மின்சார மினி பேருந்துகளை தனியாரிடம் ஒப்படைத்து கடந்த மாதம் முதல் இயக்கி வருகிறது. ஆனால், இந்தப் பேருந்துகளில் தமிழ் மொழி பயன்படுத்தப்படாமல் ஆங்கிலத்தில் மட்டுமே பாதைத் தகவல்கள் மற்றும் பேருந்துப் பெயர்கள் எழுதப்பட்டிருந்தது.

இதற்கு எதிர்ப்பு தெரிவித்து, தமிழ் உரிமை இயக்கம் சார்பில் மின்சார பேருந்து நிலையம் முன்பு கண்டன ஆர்ப்பாட்டம் நடைபெற்றது. அப்போது எதிரே வந்த ஒரு மின்சார மினி பேருந்தை போராட்டக்காரர்கள் தடுத்து நிறுத்தினர். பின்னர், பேருந்தின் முன்புறம் மற்றும் பக்கங்களில் இருந்த ஆங்கில எழுத்துக்களை அகற்ற முயன்றதால் அங்குச் சிறிது நேரம் பரபரப்பு ஏற்பட்டது.

பாதுகாப்பு பணியில் இருந்த போலீசார் போராட்டக்காரர்களை அப்புறப்படுத்தி நிலைமையை கட்டுக்குள் கொண்டுவந்தனர். பின்னர் பேருந்து மீண்டும் சாலையில் இயக்கத்திற்குப் போனது.

தமிழுக்கு முன்னுரிமை வழங்க வேண்டும் என்ற கோரிக்கையுடன் போராட்டம் நடைபெற்று வந்த நிலையில், பேருந்தில் இருந்த ஆங்கில எழுத்துக்களை நேரடியாக அகற்ற முயன்ற சம்பவம் பகுதியிலுள்ள பொதுமக்களிடையே கவனத்தை ஈர்த்தது.