ஐபிஎல் 2026 ஏலம்: இளம் இந்திய வீரர்கள் – கோடிகளில் குவிந்த ஒப்பந்தங்கள்
அபுதாபி: ஐபிஎல் 2026 தொடருக்கான வீரர்கள் ஏலம் நேற்று (டிசம்பர் 16) அபுதாபியில் நடைபெற்றது. இந்த ஏலத்தில் பல ஆச்சரியமூட்டும் நிகழ்வுகள் அரங்கேறி, கிரிக்கெட் உலகின் கவனத்தை ஈர்த்தன.
இந்த முறை, வழக்கமாக அதிக விலைக்கு போகும் பெரிய சர்வதேச நட்சத்திரங்களை விட, சர்வதேச போட்டிகளில் இதுவரை விளையாடாத இளம் இந்திய வீரர்களே தலைப்புச் செய்திகளில் இடம்பிடித்தனர். உள்நாட்டு கிரிக்கெட் போட்டிகளில் காட்டிய திறமையை அடிப்படையாக கொண்டு, இந்த வீரர்கள் சாதனை அளவிலான தொகைகளுக்கு ஏலம் போய் வரலாறு படைத்துள்ளனர்.
புதிய மற்றும் இளம் வீரர்கள் மீது அணிகள் கோடிக்கணக்கான ரூபாய்களை கொட்டியதால், ஏலம் கடும் போட்டி நிறைந்ததாக அமைந்தது. அதே நேரத்தில், எதிர்பார்ப்புகளுக்கு மாறாக, சில அனுபவம் வாய்ந்த வீரர்கள் ஏலத்தில் எடுக்கப்படாமல் போனதும் கவனம் பெற்றது.
இதற்கிடையில், ஆஸ்திரேலியாவின் நட்சத்திர ஆல்ரவுண்டர் கேமரூன் கிரீன், இதுவரை நடைபெற்ற ஐபிஎல் ஏலங்களில் மிக விலையுயர்ந்த வெளிநாட்டு வீரராக உருவெடுத்தார். அவரை கொல்கத்தா நைட் ரைடர்ஸ் அணி 25.20 கோடி ரூபாய்க்கு வாங்கியது.
மேலும், சென்னை சூப்பர் கிங்ஸ் அணி ரூ.28 கோடி செலவில் கார்த்திக் மற்றும் பிரசாந்த் ஆகிய இரு இளம் வீரர்களை வாங்கியது பெரும் பேசுபொருளாகியுள்ளது. சர்வதேச போட்டிகளில் இன்னும் களம் இறங்காத இந்த வீரர்கள், எதிர்காலத்தில் தோனி மற்றும் ஜடேஜா போன்ற மூத்த வீரர்களின் இடங்களை நிரப்புவார்களா என்ற கேள்வி ரசிகர்களிடையே எழுந்துள்ளது.
சர்வதேச அனுபவம் இல்லாத இளம் வீரர்களை சிஎஸ்கே அதிக தொகை செலவில் வாங்கியதற்குப் பின்னால், அவர்களின் நீண்டகால திட்டமிடலும், எதிர்கால அணிக் கட்டமைப்பும் காரணமாக இருக்கலாம் என கிரிக்கெட் வட்டாரங்கள் தெரிவிக்கின்றன. மொத்தத்தில், ஐபிஎல் 2026 ஏலம் இளம் திறமைகளுக்கு கிடைத்த பெரிய அங்கீகாரமாக அமைந்துள்ளது.
