திருச்செந்தூர் கடற்கரையில் இரவு தங்குவதற்கு தடை – போலீசார் கடும் நடவடிக்கை!
தூத்துக்குடி மாவட்டத்தில் அமைந்துள்ள முருகப்பெருமானின் அறுபடை வீடுகளில் ஒன்றான திருச்செந்தூர் சுப்பிரமணியசுவாமி கோவிலுக்கு தினசரி ஆயிரக்கணக்கான பக்தர்கள் வருகை தருகின்றனர். இங்கு சூரபத்மனை வதம் செய்த இடமாகவும், தெய்வானையுடன் திருமணம் நடைபெற்ற புண்ணிய ஸ்தலமாகவும், கடற்கரையை ஒட்டிய ஒரே தலமாகவும் திருச்செந்தூர் சிறப்புபெற்றுள்ளது.
சமீப ஆண்டுகளில் ஜோதிடர் ஒருவர் கூறியதாக சமூக வலைதளங்களில் பரவிய தகவலின்படி, “ஒவ்வொரு மாதமும் பௌர்ணமி நாளில் இரவு கடற்கரையில் நிலவொளியில் தங்கி, மறுநாள் அதிகாலை புனித நீராடி சுவாமி தரிசனம் செய்தால் வாழ்க்கையில் பெரிய பலன்கள் கிடைக்கும்” என்ற நம்பிக்கையால் ஆயிரக்கணக்கான பக்தர்கள் கடற்கரையில் தங்க தொடங்கினர்.
ஆனால், இதன் காரணமாக சமீபத்தில் திருட்டுச் சம்பவங்கள், பொருட்கள் காணாமல் போனது போன்ற புகார்கள் அதிகரித்தன. இதனால் பக்தர்களின் பாதுகாப்பை உறுதி செய்யும் நோக்கில், திருச்செந்தூர் கோவில் நிர்வாகம் மற்றும் காவல்துறையினர் இணைந்து புதிய உத்தரவை வெளியிட்டுள்ளனர்.
அதன்படி, இன்று முதல் இரவு 10 மணி முதல் அதிகாலை 4 மணி வரை திருச்செந்தூர் கடற்கரையில் யாரும் தங்க அனுமதி இல்லை என்று அறிவிக்கப்பட்டுள்ளது. இதை ஒலிபெருக்கி மூலம் பக்தர்களுக்கு தெரிவித்து, கடலோர பாதுகாப்பு குழுவினர், கோவில் பணியாளர்கள், காவல்துறையினர் இணைந்து கடற்கரையில் தங்கி இருந்தவர்களை அப்புறப்படுத்தினர்.
மேலும், கோவில் முன்புற கடற்கரை முதல் 500 மீட்டர் தொலைவில் உள்ள அய்யா கோவில் வரை கடுமையான கண்காணிப்பு நடைபெற்று வருகிறது. பக்தர்கள் கடற்கரையில் தங்காமல், கோவில் வளாகம் மற்றும் மண்டபங்களில் தங்குமாறு அதிகாரிகள் அறிவுறுத்தியுள்ளனர்.
இதனால், பவுர்ணமி இரவுகளில் கூட மக்கள் நடமாட்டம் செறிந்திருந்த திருச்செந்தூர் கடற்கரை தற்போது வெறிச்சோடி காணப்படுகிறது.
