கரூர் – ஆவணங்கள் எரிக்கப்பட்டதா? Pen Drive மீட்பு!
கரூரில் சிபிஐ விசாரணை தொடங்க உள்ள நிலையில் எஸ்.ஐ.டி தற்காலிக அலுவலக வளாகத்தில் தேவையற்ற ஆவண நகல்கள் தீயிலிட்டு எரிக்கப்பட்டுள்ளது – குறிப்பாக 32 GB அளவுள்ள பென் டிரைவ் ஒன்றும் கீழே வீசப்பட்டுள்ளது.
கரூர் கூட்ட நெரிசல் வழக்கு தொடர்பாக விசாரணை நடத்த கரூர் வந்துள்ள சிபிஐ அதிகாரிகளை சிறப்பு புலனாய்வு குழுவை சேர்ந்த ஏ.டி.எஸ்.பி ஒருவர் சந்தித்து, கரூர் பிரச்சார கூட்ட நெரிசல் வழக்கில் இதுவரை நடந்த விசாரணை குறித்து விளக்கம் அளித்துள்ளார்.
சிபிஐ அதிகாரிகள் தங்கி உள்ள சுற்றுலா மாளிகையில் நடந்த சுமார் 1 மணி நேர சந்திப்புக்கு பிறகு எஸ்.ஐ.டி குழுவை சேர்ந்த ஏ.டி.எஸ்.பி அங்கிருந்து சென்றார். சிறப்பு புலனாய்வு குழுவினர் கூட்ட நெரிசல் வழக்கு தொடர்பாக இதுவரை நடந்த விசாரணை விவரங்களையும், ஆவணங்களையும் சமர்ப்பித்துள்ள நிலையில், ஐபிஎஸ் பிரவீன் குமார் தலைமையில் ஏ.டி.எஸ்.பி முகேஷ்குமார், டிஎஸ்பி ராமகிருஷ்ணன் உள்ளிட்ட சிபிஐ அதிகாரிகள் குழுவினர் விசாரணையை தொடங்குவது குறித்து ஆலோசனை நடத்தி வருகின்றனர்.
சிபிஐ அதிகாரிகள் விசாரணையை தொடங்க உள்ள நிலையில், சிறப்பு புலனாய்வு குழுவின் தற்காலிக அலுவலகத்தில் இருந்து எஸ்.ஐ.டி குழுவினர் புறப்பட தயாராகி வருகின்றனர். அந்த அலுவலகத்தில் இருந்த டேபிள், சேர்கள், ஸ்டேசனரி உள்ளிட்ட பொருட்கள் எடுத்துச் செல்லும் பணி தொடங்கியது.
மேலும், கரூர் எஸ்.ஐ.டி தற்காலிக அலுவலக வளாகத்தில் வழக்கு தொடர்பான மீதமிருந்த தேவையற்ற ஆவண நகல்கள், காகித துண்டுகள் உள்ளிட்டவை தீயிலிட்டு கொழுத்தப்பட்டுள்ளது. எரிந்த காகித துண்டுகளுடன் 32 gb Pen Drive ஒன்று இருப்பது குறிப்பிடத்தக்கது. அது செயலிழந்த பென்டிரைவ் ஆக இருக்கலாம் என்றும் அதிகாரி ஒருவர் அந்த பென் டிரைவை எடுத்துச் சென்றுள்ளார் என்றும் கூறப்படுகிறது.
