டித்வா புயல் நெருங்கியது-நாகை மாவட்டம் முழுவதும் கனமழை; கோடியக்கரையில் 20 செ.மீ. மழை
வங்கக்கடலில் உருவான டித்வா புயல் வலுப்பெற்று கரையை நோக்கி நகர்ந்து வருவதால், நாகை மாவட்டத்தில் நேற்று இரவு முதல் இன்று அதிகாலை வரை இடைவிடாது கனமழை கொட்டித் தீர்த்தது. நாகை, நாகூர், வேளாங்கண்ணி, வேதாரண்யம், கோடியக்கரை, தலைஞாயிறு உள்ளிட்ட பகுதிகள் கடும் மழையால் பாதிக்கப்பட்டன.
தாழ்வான பகுதிகளில் மழை நீர் தேங்கி வெள்ளம் போல் பெருக்கெடுத்து ஓட, பல கடலோர கிராமங்களில் காற்றுடன் கூடிய கனமழையினால் இரவில் பல மணி நேரம் மின்சாரம் தடைப்பட்டது.
மழை பதிவில் கோடியக்கரையில் 20 செ.மீ., வேதாரண்யத்தில் 14.5 செ.மீ., வேளாங்கண்ணியில் 10 செ.மீ. மழை பதிவாகியுள்ளது.
பேரிடர் மேலாண்மை பலப்படுத்தப்பட்டது
டித்வா புயல் தாக்கத்தை எதிர்கொள்ள மாவட்ட நிர்வாகம் முழு எச்சரிக்கையுடன் செயல்பட்டு வருகிறது. ஆட்சியர் ஆகாஷ் உத்தரவின்படி, பள்ளி கட்டிடங்கள் மற்றும் புயல் பாதுகாப்பு மையங்கள் 24 மணி நேரமும் திறந்து வைக்கப்பட்டுள்ளன. வருவாய் துறை அதிகாரிகள், மக்களுக்கு தேவையான உணவு, அரிசி, மண்ணெண்ணெய் உள்ளிட்ட அத்தியாவசிய பொருட்களை முன்கூட்டியே தயார் நிலையில் வைத்துள்ளனர்.
வெள்ளப்பாதிப்பு ஏற்பட்டால் மீட்புப் பணிகளுக்காக ரப்பர் படகுகள், மரம் அறுக்கும் இயந்திரங்கள் போன்ற உபகரணங்கள் பாதிப்பு ஏற்படும் பகுதிகளுக்கு கொண்டு செல்லப்பட்டுள்ளன. மாநில பேரிடர் மீட்புக் குழுவும் பல்வேறு துறை அதிகாரிகளும் உஷார் நிலையில் பணியில் ஈடுபட்டு வருகின்றனர்.
மீனவர்கள் படகுகள் நிறுத்தி பாதுகாப்பு நடவடிக்கை
சூரை காற்றுடன் கனமழை தொடர்ந்து பெய்து வருவதால், நாகை மாவட்ட மீனவர்கள் விசைப்படகு மற்றும் நாட்டு படகுகளை துறைமுகம் மற்றும் கடலோரங்களில் பாதுகாப்பாக கயிறு கட்டி நிறுத்தி வைத்துள்ளனர்.
