பிகார் பேரவைத் தேர்தல்: முதல்கட்ட வாக்குப்பதிவு 64.66%!

பிகார் மாநிலத்தில் முதல்கட்டமாக நடைபெற்ற பேரவைத் தேர்தலில் 64.66 சதவிகிதம் வாக்குகள் பதிவாகியுள்ளன. 18 மாவட்டங்களைச் சேர்ந்த 121 தொகுதிகளில் இன்று (நவம்பர் 6) வாக்குப்பதிவு நடைபெற்றது.

மொத்தம் 243 தொகுதிகள் கொண்ட பிகார் பேரவைக்கு இரு கட்டங்களாக தேர்தல் நடைபெறுகிறது. முதல்கட்டத் தேர்தலில் எதிர்க்கட்சித் தலைவர் தேஜஸ்வி யாதவ், துணை முதல்வர் விஜய் குமார் சின்ஹா உள்ளிட்ட 1,314 வேட்பாளர்கள் போட்டியிடுகின்றனர்.

தலைமைத் தேர்தல் அலுவலர் வினோத் சிங் குஞ்சியால் தெரிவித்ததாவது: மாலை 6 மணி நிலவரப்படி 3.75 கோடி வாக்காளர்கள் தங்கள் வாக்குரிமையைச் செலுத்தியுள்ளனர். இது கடந்த 25 ஆண்டுகளில் மிக அதிகமான வாக்குப்பதிவு என தேர்தல் ஆணையம் தெரிவித்துள்ளது.

மொத்தம் 45,341 வாக்குச்சாவடிகளில் வாக்குப்பதிவு நடைபெற்றது. பாதுகாப்பு காரணங்களால் சிம்ரி பக்தியார்பூர், மஹிஷி, தாராபூர், முங்கர், ஜமால்பூர் மற்றும் சூர்யாகர்ஹா தொகுதிகளில் உள்ள 56 வாக்குச்சாவடிகளில் வாக்குப்பதிவு மாலை 5 மணிக்கே நிறைவு பெற்றது.

அதிகபட்ச வாக்குப்பதிவு பெகுசராய் தொகுதியில் 67.32%, அதன் பின் சமஸ்திபூரில் 66.65%, மாதேபுராவில் 65.74% என பதிவாகியுள்ளது.

மீதமுள்ள 122 தொகுதிகளுக்கான இரண்டாவது கட்ட வாக்குப்பதிவு நவம்பர் 11-ஆம் தேதி நடைபெறவுள்ளது. வாக்கு எண்ணிக்கை நவம்பர் 14-ஆம் தேதி நடைபெற்று முடிவுகள் அறிவிக்கப்படும்.