பாகிஸ்தானின் தாக்குதல்: ஆப்கானிஸ்தானில் 9 குழந்தைகள் உள்ளிட்ட 10 பேர் பலி
பாகிஸ்தானில் அண்மைக்காலமாக பயங்கரவாத தாக்குதல்கள் அதிகரித்து வரும் நிலையில், இதற்குக் காரணம் டெகரிக் இ தாலிபான் பாகிஸ்தான் (TTP) அமைப்பினருக்கு ஆப்கானிஸ்தான் காபூல் அரசு அடைக்கலம் வழங்குவதாக பாகிஸ்தான் குற்றம்சாட்டியுள்ளது.
ஆனால், ஆப்கானிஸ்தானின் தாலிபான் அரசாங்கம் இந்த குற்றச்சாட்டை திட்டவட்டமாக மறுத்துள்ளது.
இதனால் இருநாடுகளுக்கும் இடையில் பதற்றம் அதிகரித்து வந்த நிலையில், கடந்த மாதமே பாகிஸ்தான் ராணுவம் ஆப்கானிஸ்தான் மீது தாக்குதல் நடத்தியது. இந்த தாக்குதலுக்கு பிந்தியும் சூழல் சமாதானமாகவில்லை.
இந்நிலையில், மோதலின் தீவிரம் மேலும் உயர் நிலையில் நீடிக்கும் நிலையில், ஆப்கானிஸ்தானின் பாக்டிகா, குனார் உள்ளிட்ட நான்கு மாகாணங்களில் பாகிஸ்தான் ராணுவம் சரமாரி வான்தாக்குதல் நடத்தியுள்ளது.
இந்த தாக்குதலில் அங்குள்ள ஒரு வீடு முழுவதும் இடிந்து தரைமட்டமாகி, 9 குழந்தைகள் உள்பட 10 பேர் பலியானது அந்தப் பகுதியை அதிர்ச்சியடைய செய்துள்ளது.
இதன் காரணமாக பாகிஸ்தான்-ஆப்கானிஸ்தான் எல்லை மோதல் புதிய உச்சத்தை எட்டியுள்ளது என்று சர்வதேச சமூகங்கள் கவலை வெளியிட்டுள்ளன.
