தமிழகத்தில் தொடரும் காவல் மரணங்கள்… சட்டம்-ஒழுங்கு மீதான நம்பிக்கை கேள்விக்குறியா?

தமிழ்நாட்டில் கடந்த சில ஆண்டுகளாக காவல் மரணங்களும், காவலில் உள்ளவர்களுக்கு எதிரான சித்திரவதைகள் குறித்த குற்றச்சாட்டுகளும் தொடர்ந்து அதிகரித்து வருவது பெரும் கவலையை ஏற்படுத்தியுள்ளது. மனித உரிமைகள் பாதுகாப்பு, காவல்துறை செயல்பாடு மற்றும் சட்டம்-ஒழுங்கு குறித்து மீண்டும் தீவிரமான விவாதங்கள் எழுந்துள்ளன.

கடந்த ஐந்து ஆண்டுகளில் தமிழகத்தில் சுமார் 39 காவல் மரணங்கள் பதிவாகியுள்ளன. இதில் கடந்த ஓராண்டில் மட்டும் 13 மரணங்களும், கடந்த இரண்டு மாதங்களில் மட்டும் 4 மரணங்களும் நடந்ததாகப் பல்வேறு தரப்புகள் சுட்டிக்காட்டுகின்றன. தென்னிந்திய மாநிலங்களிலேயே காவல் மரணங்கள் அதிகம் நிகழும் மாநிலமாக தமிழ்நாடு இருப்பதாகவும் தகவல்கள் தெரிவிக்கின்றன.

இதற்கிடையே, Lokniti-CSDS அமைப்பின் ஆய்வறிக்கையில், தமிழக காவல்துறையினரில் 91 சதவீதம் பேர் குற்றப் புலனாய்வின்போது சித்திரவதை அவசியம் என்ற மனநிலையைக் கொண்டிருப்பதாக குறிப்பிடப்பட்டுள்ளது. இந்த ஆய்வறிக்கை மனித உரிமை ஆர்வலர்கள் மத்தியில் கவலையை ஏற்படுத்தியுள்ளது.

காவல் நிலையங்களில் மனித உரிமைகள் பாதுகாக்கப்பட வேண்டும் என்றும், காவல் மரணங்கள் மற்றும் சித்திரவதைகள் தொடர்பாக வெளிப்படையான விசாரணைகள் நடத்தப்பட வேண்டும் என்றும் சமூக ஆர்வலர்கள் மற்றும் மனித உரிமை அமைப்புகள் தொடர்ந்து வலியுறுத்தி வருகின்றன. காவல்துறையின் செயல்பாடுகளில் வெளிப்படைத்தன்மை, பொறுப்புணர்வு மற்றும் மனிதநேய அணுகுமுறையை வலுப்படுத்துவதன் மூலமே பொதுமக்களின் நம்பிக்கையை மீட்டெடுக்க முடியும் என்றும் அவர்கள் கருத்து தெரிவிக்கின்றனர்.

காவல் மரணங்கள் தொடர்பான குற்றச்சாட்டுகள், அவற்றின் விசாரணை மற்றும் காவல்துறை சீர்திருத்தம் தொடர்பான விவாதங்கள் தமிழ்நாட்டில் தொடர்ந்து கவனிக்கப்படும் முக்கிய பிரச்சினையாக மாறியுள்ளது.