திருப்பூர்:
வரும் நவம்பர் 6ஆம் தேதி நடைபெற உள்ள பிஹார் சட்டப்பேரவைத் தேர்தலை முன்னிட்டு, திருப்பூரில் பணிபுரியும் பீகாரை சேர்ந்த ஆயிரக்கணக்கான தொழிலாளர்கள் தங்கள் சொந்த ஊர்களுக்குத் திரும்பி வருகின்றனர். இதனால், திருப்பூர் ரயில் நிலையத்தில் பெரும் கூட்ட நெரிசல் ஏற்பட்டது.
தங்களின் வாக்குரிமையைச் செலுத்துவதற்காக விடுமுறை எடுத்த தொழிலாளர்கள், இன்று அதிகாலை முதலே ரயில் நிலையம் நோக்கி திரண்டனர். இதனால் பல்வேறு ரயில் நிலைய நுழைவாயில்கள், பிளாட்ஃபாரங்கள் மற்றும் முன்பதிவு மையங்கள் மக்கள் கூட்டத்தால் நிரம்பி வழிந்தன.
ரயில்களில் இடம் பிடிக்க பலரும் அவசரமாக ஏறியதால், சில இடங்களில் முண்டியடிக்கும் நிலையும் ஏற்பட்டது. காவல்துறை மற்றும் ரயில்வே பாதுகாப்பு பணியாளர்கள் கூட்டத்தை கட்டுப்படுத்தும் பணியில் ஈடுபட்டனர்.
பீகாரைச் சேர்ந்த தொழிலாளர்கள் பெரும்பாலும் திருப்பூர், கோயம்புத்தூர், ஈரோடு உள்ளிட்ட மாவட்டங்களில் நூல் மற்றும் ஆடை தொழிற்சாலைகளில் பணியாற்றி வருகின்றனர். தேர்தலை முன்னிட்டு, தங்கள் சொந்த ஊர்களில் வாக்களிக்க பெரும்பாலானோர் புறப்பட்டதால், ரயில் நிலையம் முழுவதும் பரபரப்பாக காணப்பட்டது.
ரயில்வே அதிகாரிகள், தேவைக்கேற்ப கூடுதல் பெட்டிகள் இணைக்கப்பட்டுள்ளதாகவும், பயணிகள் ஒழுங்காக ஏறுவதற்கான அறிவுறுத்தல்கள் வழங்கப்பட்டுள்ளதாகவும் தெரிவித்துள்ளனர்.
Post Views: 41
