தமிழ்நாட்டில் கனமழை எச்சரிக்கை

தமிழகத்தில் அடுத்த சில நாட்களில் மழை அதிகரிக்கும் நிலையில், சென்னையிலும் இன்று மற்றும் நாளை மிதமான மழை பெய்யக்கூடும் என்று சென்னை வானிலை ஆய்வு மையம் தெரிவித்துள்ளது. தென் இலங்கை மற்றும் தென்மேற்கு வங்கக்கடல் பகுதிகளில் உருவாகியுள்ள வளிமண்டல மேலடுக்கு சுழற்சியின் தாக்கத்தால் மாநிலம் முழுவதும் மழை செயல்பாடு தொடரும் என அறிவிக்கப்பட்டுள்ளது.

இன்று (14.11.2025) தமிழகம், புதுவை மற்றும் காரைக்கால் பகுதிகளில் இடி-மின்னலுடன் கூடிய லேசான முதல் மிதமான மழை பெய்ய வாய்ப்புள்ளது. குறிப்பாக திருநெல்வேலி மலைப்பகுதிகள், தேனி, தென்காசி, கன்னியாகுமரி மற்றும் தூத்துக்குடி மாவட்டங்களில் ஓரிரு இடங்களில் கனமழை ஏற்படும் என்றும் தெரிவிக்கப்பட்டுள்ளது. நாளையும் மறுநாளும் கடலோரம் மற்றும் உள் தமிழக மாவட்டங்களில் மிதமான மழை தொடரக்கூடும். மயிலாடுதுறை, நாகை, திருவாரூர், தஞ்சை, புதுக்கோட்டை உள்ளிட்ட மாவட்டங்களில் கனமழை சாத்தியம் அதிகமாக உள்ளது.

நவம்பர் 17ஆம் தேதி சென்னை, திருவள்ளூர், காஞ்சிபுரம், செங்கல்பட்டு, விழுப்புரம், கடலூர் உள்ளிட்ட 12க்கும் மேற்பட்ட மாவட்டங்களில் கனமழை பெய்ய வாய்ப்பு இருப்பதாக முன்னறிவிப்பு வெளியாகியுள்ளது. அதே நேரத்தில் 18ஆம் தேதி கன்னியாகுமரி, திருநெல்வேலி, தூத்துக்குடி, திருவள்ளூர் மற்றும் இராணிப்பேட்டை மாவட்டங்களில் கனமழை தொடரக்கூடும். நவம்பர் 19 மற்றும் 20ஆம் தேதிகளில் தமிழகம் முழுவதும் லேசான முதல் மிதமான மழை நிலவும் என கூறப்பட்டுள்ளது.

சென்னைக்கான தனிப்பட்ட வானிலை முன்னறிவிப்பில் இன்று மற்றும் நாளை வானம் மேகமூட்டத்துடன் காணப்படும் நிலையில் சில பகுதிகளில் லேசான மழை பெய்யக்கூடும். நகரின் அதிகபட்ச வெப்பநிலை 32 டிகிரி செல்சியஸை ஒட்டியும், குறைந்தபட்சம் 25 முதல் 26 டிகிரிக்கும் இடையில் இருக்கும் வாய்ப்புள்ளதாக கூறப்பட்டுள்ளது.

மீனவர்களுக்கு சென்னைவானிலை மையம் முக்கிய எச்சரிக்கையும் வெளியிட்டுள்ளது. நவம்பர் 14 முதல் 16 வரை தென் தமிழக கடற்கரை, மன்னார் வளைகுடா மற்றும் குமரிக்கடல் பகுதிகளில் மணிக்கு 35 முதல் 55 கிமீ வரை பலத்த காற்று வீசக்கூடும் என்பதால், மீனவர்கள் இப்பகுதிகளுக்கு செல்ல வேண்டாம் என அறிவுறுத்தப்பட்டுள்ளது. அதேபோல் 18ஆம் தேதி அந்தமான் கடல் பகுதிகளிலும் இதேபோன்ற பலத்த காற்று வீசக்கூடும் என்பதும் குறிப்பிடப்பட்டுள்ளது.