டிராவிட் – சேவாக் வாரிசுகள் என்ட்ரி! இந்திய U-19 அணியில் இடம்பிடித்த ஜாம்பவான்களின் மகன்கள்
இந்திய கிரிக்கெட் ஜாம்பவான்களான ராகுல் டிராவிட் மற்றும் வீரேந்தர் சேவாக்கின் மகன்கள், இந்திய U-19 அணியில் இடம்பிடித்துள்ளனர். ஆஸ்திரேலியாவுக்கு எதிரான ஒருநாள் தொடருக்கான அணியில் அன்வே டிராவிட் மற்றும் ஆர்யவீர் சேவாக் தேர்வு செய்யப்பட்டிருப்பது ரசிகர்கள் மத்தியில் கவனம் பெற்றுள்ளது.
வரும் செப்டம்பர் 18ஆம் தேதி தொடங்கும் ஆஸ்திரேலிய U-19 தொடரில் 3 ஒருநாள் போட்டிகள் மற்றும் 2 பல நாள் போட்டிகள் நடைபெற உள்ளன. இதற்கான அணிகளை பிசிசிஐ தேர்வுக் குழு அறிவித்துள்ளது.
ராகுல் டிராவிட்டின் 17 வயது மகன் அன்வே டிராவிட், விக்கெட் கீப்பர்-பேட்டராக ஒருநாள் அணியில் இடம்பெற்றுள்ளார். கடந்த மாதம் இலங்கை சுற்றுப்பயணத்தில் இந்திய U-19 அணிக்காக விளையாடிய அன்வே, இரண்டு போட்டிகளில் 14 மற்றும் 87 ரன்கள் எடுத்திருந்தார்.
மறுபுறம், வீரேந்தர் சேவாக்கின் 18 வயது மகன் ஆர்யவீர் சேவாக்கிற்கு இந்திய U-19 அணியில் இடம் கிடைப்பது இதுவே முதல் முறையாகும். தற்போது டெல்லி பிரீமியர் லீக்கில் விளையாடி வரும் ஆர்யவீர், தனது திறமையால் இந்த வாய்ப்பைப் பெற்றுள்ளார்.
அன்வே டிராவிட் மற்றும் ஆர்யவீர் சேவாக் இருவரும் ஒருநாள் தொடருக்கான அணியில் மட்டுமே இடம்பெற்றுள்ளனர். இதனால், இந்திய கிரிக்கெட்டின் முன்னாள் நட்சத்திரங்களான டிராவிட் – சேவாக் கூட்டணியின் அடுத்த தலைமுறையும் களமிறங்குவது ரசிகர்களின் எதிர்பார்ப்பை அதிகரித்துள்ளது.
இந்திய U-19 அணியின் ஒருநாள் தொடருக்கு லக்ஷ்யா ராய்ச்சந்தானி கேப்டனாகவும், யாஷ்பர்தன் சௌகான் துணை கேப்டனாகவும் நியமிக்கப்பட்டுள்ளனர். முதல் மூன்று ஒருநாள் போட்டிகளும் ராஜ்கோட்டில் நடைபெற உள்ளன.
டிராவிட் – சேவாக் இணைந்து இந்திய அணியில் ஏற்படுத்திய தாக்கத்தைப் போல, அவர்களின் மகன்களும் ஜூனியர் கிரிக்கெட்டில் இணைந்து சாதிப்பார்களா என்ற எதிர்பார்ப்பு தற்போது ரசிகர்கள் மத்தியில் எழுந்துள்ளது.
