எம்.ஜி.ஆரை நினைவூட்டிய அந்த முகம்… யாரும் எதிர்பார்க்காத அதிர்ச்சி!

கேரளத்தின் பாலக்காட்டு தெருக்களில் ஒரு சாதாரண இளைஞனாக நடமாட தொடங்கியபோது, தனக்குள் இருக்கும் ஒரு பழம்பெரும் பிம்பம் தன்னை எல்லைகள் கடந்து கொண்டுபோய் சேர்க்கும் என்று ஷியாஸ் நினைத்திருக்க மாட்டார்.

பள்ளி, கல்லூரி நாள்களிலேயே சக தோழர்கள் ‘முகமும் சிரிப்பும் எம்.ஜி.ஆர் மாதிரியே இருக்குடா’ என்று இயல்பாக சொன்ன வார்த்தைகள் தான், பின்னாளில் அவரது வாழ்க்கையின் பிரிக்க முடியாத அடையாளமாக மாறும் விதையாக அமைந்தது.

எம்.ஜி.ஆரின் அச்சு அசலான தோற்ற ஒற்றுமைக்காகவே மக்கள் மத்தியில் ‘கேரள எம்.ஜி.ஆர்’ என்றும் ‘ஜூனியர் எம்.ஜி.ஆர்’ என்றும் அழைக்கப்பட்ட ஷியாஸ், இந்த அடையாளத்தை வெறும் வணிக ரீதியான ‘டூப்’ வேலையாக மட்டும் பார்க்கவில்லை. புரட்சி தலைவரின் அடையாளங்களான அந்த வெள்ளை தொப்பி, கறுப்பு கண்ணாடி, கை கடிகாரம், தனித்துவமான உதட்டோர சிரிப்பு மற்றும் கம்பீரமாக நடக்கும் பாணி ஆகியவற்றை தன் இயல்பிலேயே உள்வாங்க தொடங்கினார்.

தொடக்கத்தில் நண்பர்களின் வற்புறுத்தலால் டிக்டாக், இன்ஸ்டாகிராம், யூடியூப் போன்ற சமூக வலைதளங்களில் எம்.ஜி.ஆரின் பாடல்களுக்கு ரீல்ஸ் செய்ய தொடங்கியபோது, ‘எம்.ஜி.ஆரே மீண்டும் வந்துவிட்டார்’ என்று பாராட்டு மழை பொழிய தொடங்கியது.

வெறும் மேக்கப் மட்டுமே ஒருவரை எம்.ஜி.ஆராக மாற்றிவிடாது என்பதை உணர்ந்திருந்த ஷியாஸ், பழைய திரைப்படங்களை இரவு பகலாக பார்த்து அவரது நடை, கைகளை வீசும் நேர்த்தி, சண்டைக்காட்சிகளின் சைகைகள், நடன அசைவுகள் என ஒவ்வொன்றையும் துல்லியமாக பயின்று மெருகேற்றியுள்ளார்..

சமூக வலைதள அலை அவரை மேடை நிகழ்ச்சிகள், கோவில் திருவிழாக்கள் மற்றும் கடை திறப்பு விழாக்கள் வரை கொண்டு சென்றது. தமிழகத்தின் கிராமப்புற நிகழ்ச்சிகளுக்கு செல்லும்போது, எம்.ஜி.ஆரை தெய்வமாக வணங்கிய முதியவர்களும், தாய்மார்களும் ஷியாஸை நேரில் பார்த்து கண்கலங்கி, கைகளை பிடித்து ஆசிர்வாதம் செய்தனர் . ‘அவங்க பார்க்கிறது என்னையல்ல; என் வழியா அவங்க நேசிச்ச தலைவரை பார்க்கிறாங்க’ என்று நெகிழ்ந்து கூறும் அளவுக்கு அவர் புகழின் உச்சத்திலும் பணிவோடு நின்றார்.

‘அடுத்தவரை போல வாழ்ந்து என்ன பயன்?’ என்ற விமர்சனங்களை, ‘ஒரு மாபெரும் சகாப்தத்தை இந்த தலைமுறைக்கு நினைவூட்டும் வாய்ப்பு எனக்குக் கிடைத்த பாக்கியம்’ என்றே எதிர்கொண்டார். இந்த அர்ப்பணிப்பு அவருக்கு குறும்படங்கள், விளம்பரங்கள் மற்றும் திரைப்பட வாய்ப்புகளையும் தேடித் தந்தது.

இப்படி தன் அசாத்தியமான முக ஒற்றுமையாலும், உழைப்பாலும் கேரளா மற்றும் தமிழ்நாடு மக்களின் இதயங்களில் புன்னகையோடு இடம்பிடித்த அந்த எளிய கலைஞன், இன்று ஒரு கடுமையான வாழ்வியல் போராட்டத்தை எதிர்கொண்டிருக்கிறார்.

திடீரென ஏற்பட்ட உடல்நலக்குறைவு காரணமாக ஷியாஸ் தற்போது மருத்துவமனையில் அனுமதிக்கப்பட்டுள்ளார். அவரது உடல்நிலை சற்றுக் கவலைக்கிடமாக இருப்பதாக வெளியாகிவரும் தகவல்கள், அவரை பார்த்து ரசித்த எண்ணற்ற ரசிகர்களை மிகுந்த அதிர்ச்சியிலும் சோகத்திலும் ஆழ்த்தியுள்ளது.

எத்தனையோ மேடைகளில் புரட்சித் தலைவரின் கம்பீரத்தை மீளுருவாக்கம் செய்து மக்களை உற்சாகப்படுத்திய ஷியாஸ், இந்த உடல்நலப் பின்னடைவிலிருந்து முழுமையாக மீண்டு, அதே புன்னகையோடு மீண்டும் மக்கள் மத்தியில் வலம் வர வேண்டும் என்பதே அனைவரின் கூட்டு பிரார்த்தனையாக உள்ளது.

இச்செய்தி தொடர்பான முழு காணொளியை SS News சேனல் -ல் காணலாம்