வரலாறு படைத்த சூர்யவன்ஷி…

இந்தியா ஏ, இலங்கை ஏ, ஆப்கானிஸ்தான் ஏ அணிகள் பங்கேற்ற முத்தரப்பு ஒருநாள் கிரிக்கெட் தொடர் இலங்கையில் நடைபெற்றது. இந்தத் தொடரின் இறுதிப்போட்டிக்கு இந்தியா ஏ மற்றும் இலங்கை ஏ அணிகள் தகுதி பெற்றன.

இந்நிலையில், ஜூன் 21-ஆம் தேதி நடைபெற்ற இறுதிப்போட்டியில் முதலில் பேட்டிங் செய்த இந்தியா ஏ அணி, சூர்யவன்ஷியின் அதிரடி ஆட்டத்தால் 50 ஓவர்களில் 377 ரன்கள் குவித்தது.

போட்டியின் தொடக்கத்திலேயே வெடித்துச் சிதறிய சூர்யவன்ஷி, முதல் 11 பந்துகளில் 5 பவுண்டரிகள் மற்றும் 5 சிக்சர்கள் விளாசி ரன் மழை பொழிந்தார். அதன்பின் வெறும் 13 பந்துகளில் அரைசதம் அடித்து புதிய வரலாறு படைத்தார். சர்வதேச போட்டி அல்லாத போதிலும், யுவராஜ் சிங்கின் 12 பந்துகளில் அரைசதம் என்ற சாதனையைத் தொடர்ந்து, லிஸ்ட்-ஏ கிரிக்கெட்டில் அதிவேக அரைசதம் அடித்த வீரர் என்ற பெருமையைப் பெற்றார்.

தொடர்ந்து அதிரடியாக விளையாடிய சூர்யவன்ஷி, 10 பவுண்டரிகள் மற்றும் 8 சிக்சர்களுடன் 29 பந்துகளில் 94 ரன்கள் குவித்து ஆட்டமிழந்தார். அவரது ஸ்ட்ரைக் ரேட் 324-ஐ கடந்தது.

378 ரன்கள் என்ற கடின இலக்கை துரத்திய இலங்கை ஏ அணி, 47.1 ஓவர்களில் 311 ரன்களுக்கு அனைத்து விக்கெட்டுகளையும் இழந்தது. இதனால் இந்தியா ஏ அணி 66 ரன்கள் வித்தியாசத்தில் வெற்றி பெற்று கோப்பையை கைப்பற்றியது.

இறுதிப்போட்டியில் 29 பந்துகளில் 94 ரன்கள் குவித்த சூர்யவன்ஷி ஆட்டநாயகன் விருதை வென்றார்.