சாதனைகளுக்குச் சொந்தக்காரர் செஃப் தாமு மறைவு!

பிரபல சமையல் கலைஞரும், தொலைக்காட்சி நிகழ்ச்சிகள் மூலம் மக்களிடையே பெரும் வரவேற்பைப் பெற்றவருமான செஃப் தாமு (72), சென்னையில் உள்ள தனியார் மருத்துவமனையில் சிகிச்சை பெற்று வந்த நிலையில், அக்டோபர் 25-ஆம் தேதி காலமானார். அவரது மறைவு சமையல் கலைத் துறையினர், தொலைக்காட்சி ரசிகர்கள் மற்றும் திரையுலகினர் மத்தியில் பெரும் சோகத்தை ஏற்படுத்தியுள்ளது.

கே. தாமோதரன் என்ற இயற்பெயர் கொண்ட செஃப் தாமு, தனது தனித்துவமான சமையல் திறமை, அனுபவம் மற்றும் எளிமையான அணுகுமுறையால் மக்களிடையே பிரபலமானார். குறிப்பாக, விஜய் தொலைக்காட்சியில் ஒளிபரப்பான ‘குக் வித் கோமாளி’ நிகழ்ச்சியின் தொடக்க காலம் முதல் நடுவராகப் பங்கேற்று வந்தார். இந்த நிகழ்ச்சியின் மூலம் குழந்தைகள் முதல் பெரியவர்கள் வரை பலதரப்பட்ட ரசிகர்களின் அன்பைப் பெற்றார். போட்டியாளர்களுடன் அன்பாகப் பழகுவது, சமையல் குறித்த ஆலோசனைகளை வழங்குவது மற்றும் நகைச்சுவையான கருத்துகளைப் பகிர்வது என அவரது பங்களிப்பு ரசிகர்களைக் கவர்ந்தது.

சமையல் துறையில் செஃப் தாமு நிகழ்த்திய சாதனைகளும் குறிப்பிடத்தக்கவை. கடந்த 2010-ஆம் ஆண்டு, தொடர்ந்து 24 மணி நேரத்திற்கும் மேலாகச் சமையல் செய்து, 617 வகையான உணவுகளைத் தயாரித்து கின்னஸ் உலக சாதனை படைத்தார். இந்தச் சாதனை அவரது சமையல் திறமைக்கும் விடாமுயற்சிக்கும் முக்கியச் சான்றாக அமைந்தது. மேலும், சென்னைப் பல்கலைக்கழகத்தில் உணவக மேலாண்மை மற்றும் சமையல் கலைத் தொழில்நுட்பத்தில் முனைவர் பட்டம் பெற்ற முதல் இந்தியச் சமையல் கலைஞர் என்ற பெருமையையும் பெற்றிருந்தார்.

சமையல் நிகழ்ச்சிகளில் மட்டுமின்றி, உணவகத் துறையிலும் அவர் நீண்டகால அனுபவம் பெற்றிருந்தார். இளம் சமையல் கலைஞர்களுக்கு வழிகாட்டியாகவும் செயல்பட்டார். சமையல் துறையில் அவர் ஆற்றிய பங்களிப்பைப் பாராட்டி, மத்திய அரசு 2025-ஆம் ஆண்டு அவருக்கு பத்மஸ்ரீ விருது வழங்கிக் கௌரவித்தது.

செஃப் தாமுவின் மறைவுக்குத் தமிழக முதல்வர் விஜய் உள்ளிட்ட அரசியல் தலைவர்களும், பிரபல சமையல் கலைஞர்களும் இரங்கல் தெரிவித்துள்ளனர். தொலைக்காட்சி நிகழ்ச்சிகள் வழியாகச் சமையலை மக்களிடம் கொண்டு சேர்த்த அவரது பங்களிப்பு என்றும் நினைவுகூரப்படும்.