‘காவாலா’ வைப்.. ‘அலா பொலேலோ’ ஹைப்! ஜெயிலர் 2 பாடல் வெளியீடு
நெல்சன் திலீப்குமார் இயக்கத்தில் ரஜினிகாந்த் நடிப்பில் உருவாகி வரும் ‘ஜெயிலர் 2’ திரைப்படம் ரசிகர்கள் மத்தியில் மிகப்பெரிய எதிர்பார்ப்பை ஏற்படுத்தியுள்ளது. முதல் பாகம் உலகளவில் ரூ.650 கோடிக்கும் மேல் வசூலித்து வெற்றி பெற்ற நிலையில், இரண்டாம் பாகத்திற்கும் ரசிகர்கள் மத்தியில் எதிர்பார்ப்பு அதிகரித்துள்ளது.
இந்த நிலையில், படத்தின் புதிய பாடலான ‘அலா பொலேலோ’ தற்போது வெளியாகியுள்ளது. அனிருத் ரவிச்சந்தர் இசையமைத்து பாடியுள்ள இந்த துள்ளலான பாடலை அருண்ராஜா காமராஜ் எழுதியுள்ளார்.
பாடலில் சூப்பர் ஸ்டார் ரஜினிகாந்த் மற்றும் நடிகை ஷாம்னா காசிம் இடம்பெற்றுள்ளனர். குறிப்பாக, பாடலில் மலையாள சாயல் அதிகமாக இருப்பது ரசிகர்களின் கவனத்தை ஈர்த்துள்ளது.
ஓணம் பண்டிகையை முன்னிட்டு கேரள ரசிகர்களுக்கு சிறப்பு விருந்தாக இந்தப் பாடல் வெளியிடப்பட்டுள்ளது. பாடல் வெளியாகும் முன்பு வெளியான முன்னோட்டங்கள் சமூக வலைதளங்களில் கலவையான விமர்சனங்களை பெற்றிருந்த நிலையில், தற்போது முழுப் பாடல் ரசிகர்களிடையே வரவேற்பை பெற்று வருகிறது.
‘ஜெயிலர்’ படத்தில் தமன்னா நடனமாடிய ‘காவாலா’ பாடல் மிகப்பெரிய ஹிட் ஆன நிலையில், அதேபோன்ற ஒரு பண்டிகை வைப் மற்றும் துள்ளலான நடனத்துடன் ‘அலா பொலேலோ’ பாடலும் உருவாகியுள்ளது.
எனினும், பாடல் முன்னோட்டம் வெளியானபோது சில மலையாள ரசிகர்கள், பாடலில் இடம்பெற்றுள்ள மலையாள வார்த்தைகளின் உச்சரிப்பு குறித்து சமூக வலைதளங்களில் விமர்சனங்களை முன்வைத்திருந்தனர்.
இந்நிலையில், ‘அலா பொலேலோ’ பாடல் வெளியாகி ரசிகர்களின் கவனத்தை ஈர்த்துள்ளதால், இது ‘காவாலா’ அளவுக்கு பெரிய ஹிட் ஆகுமா என்ற எதிர்பார்ப்பும் உருவாகியுள்ளது.
