“டோரதியின் தாக்கம் ஆழமானது” | திரைப்படம் என்னை மாற்றியது – நடிகர் ரிஷிகாந்த் ஓபன் டாக்
கார்த்திக் சுப்புராஜ் எழுதி இயக்கியுள்ள ‘டோரதி’ படத்தில் கீர்த்தி சுரேஷ், சனந்த் மற்றும் ரிஷிகாந்த் ஆகியோர் முக்கிய கதாபாத்திரங்களில் நடித்துள்ளனர். இளையராஜா இசையமைத்துள்ள இப்படத்திற்கு எஸ். திருநாவுக்கரசு ஒளிப்பதிவு செய்துள்ளார். கணேஷ் சிவா படத்தொகுப்பு பணிகளை மேற்கொண்டுள்ளார். ஜியோ ஸ்டுடியோஸ் மற்றும் சிக்யா என்டர்டெயின்மென்ட் இணைந்து இப்படத்தை வழங்கியுள்ளன.
வித்தியாசமான கதாபாத்திரங்களைத் தேர்ந்தெடுத்து நடித்து வரும் நடிகர் ரிஷிகாந்த், கார்த்திக் சுப்புராஜ் இயக்கியுள்ள ‘டோரதி’ திரைப்படத்தில் ‘கார்த்தி’ என்ற கதாபாத்திரத்தில் நடித்துள்ளார். அவரது நடிப்புக்கு ரசிகர்கள் மற்றும் விமர்சகர்கள் மத்தியில் பாராட்டுகள் குவிந்து வருகின்றன.
இதுகுறித்து பேசிய ரிஷிகாந்த், “ரசிகர்களிடம் இருந்து கிடைக்கும் அன்பும் ஆதரவும் நான் எதிர்பார்க்காத ஆசீர்வாதம். பரிசோதனை முயற்சிகளைக் கொண்ட திரைப்படங்களுக்கு பாராட்டுகளுடன் விமர்சனங்களையும் எதிர்கொள்ள தயாராக இருக்க வேண்டும். ஆனால், கார்த்திக் சுப்புராஜின் சிறப்பான திரைக்கதை ஒவ்வொரு கதாபாத்திரத்தையும் தனித்துவமாக உருவாக்கியுள்ளது” என்றார்.
மேலும், “இந்த வெற்றி என்னுடையது மட்டுமல்ல. சனந்தின் சிறப்பான நடிப்பு எனது கதாபாத்திரத்தை மேலும் உயர்த்தியது. கீர்த்தி சுரேஷின் கதாபாத்திரம் படத்தின் மையமாக அமைந்துள்ளது. அவருக்குக் கிடைக்கும் அனைத்து பாராட்டுகளுக்கும் அவர் முழுமையாகத் தகுதியானவர்” எனத் தெரிவித்தார்.
படத்தின் இசை மற்றும் ஒளிப்பதிவையும் பாராட்டிய ரிஷிகாந்த், “இளையராஜாவின் இசை படத்திற்கு மிகப்பெரிய பலம். ஒளிப்பதிவாளர் எஸ். திருநாவுக்கரசுவின் காட்சியமைப்புகள் படத்தின் வெற்றிக்கு முக்கிய காரணம்” என்றார்.
இறுதியாக, “‘டோரதி’ ஒரு திரைப்படம் என்பதைத் தாண்டி என்னுள் ஆழமான தாக்கத்தை ஏற்படுத்தியுள்ளது. இது வாழ்க்கையை மாற்றக்கூடிய அனுபவமாக மட்டுமல்லாமல், பார்வையாளர்களின் கண்ணோட்டத்தையும் மாற்றும்” என ரிஷிகாந்த் கூறினார்.
