தமிழகத்தில் 6 AM சிறப்புக் காட்சிகளுக்கு அனுமதி!

தமிழகத்தில் புதிய திரைப்படங்கள் வெளியாகும் முதல் வாரத்தில் தினமும் ஆறு காட்சிகள் திரையிட தமிழக அரசு அனுமதி வழங்கியுள்ளது. இதன்படி, காலை 6 மணி முதல் மறுநாள் அதிகாலை 2.30 மணி வரை திரையரங்குகளில் திரைப்படங்களைத் திரையிடலாம் என அறிவிக்கப்பட்டுள்ளது.

1957-ஆம் ஆண்டு தமிழ்நாடு திரையரங்குகள் (ஒழுங்குமுறை) விதிகளின்படி, வழக்கமாக திரையரங்குகளில் தினமும் நான்கு காட்சிகள் மட்டுமே திரையிடப்பட்டு வந்தன. பின்னர் புதிய தமிழ்த் திரைப்படங்கள் வெளியான முதல் ஏழு நாட்களுக்கு ஐந்து காட்சிகள் திரையிட அனுமதி வழங்கப்பட்டது.

இந்நிலையில், திரைப்படத் தயாரிப்பாளர்கள் சங்கம், தமிழ் பிலிம் ஆக்டிவ் ப்ரொடியூசர்ஸ் அசோசியேஷன் மற்றும் திரையரங்கு உரிமையாளர்கள் சங்கம் ஆகியவை தினமும் ஆறு காட்சிகள் திரையிட அனுமதி வழங்க வேண்டும் என்று தமிழக அரசிடம் கோரிக்கை வைத்திருந்தன.

இந்தக் கோரிக்கையைப் பரிசீலித்த முதலமைச்சர் விஜய், புதிய தமிழ்த் திரைப்படங்கள் வெளியாகும் முதல் ஏழு நாட்களுக்கு தினமும் ஆறு காட்சிகள் வரை திரையிட அனுமதி வழங்க உத்தரவிட்டுள்ளார். மேலும், உள்ளூர் பண்டிகை நாட்கள், பொது விடுமுறை நாட்கள், சனி மற்றும் ஞாயிற்றுக்கிழமைகளிலும் ஆறு காட்சிகள் திரையிட அனுமதி அளிக்கப்பட்டுள்ளது.

இதனால், நவம்பர் 6-ம் தேதி தீபாவளியை முன்னிட்டு வெளியாகும் சூர்யாவின் ‘Scene’, நயன்தாராவின் ‘மூக்குத்தி அம்மன் 2’ உள்ளிட்ட திரைப்படங்களுக்கு அதிகாலை 6 மணி காட்சிகள் திரையிட வழிவகை ஏற்பட்டுள்ளது. இந்த அறிவிப்பு திரைப்பட ரசிகர்கள் மற்றும் திரையுலகினர் மத்தியில் வரவேற்பைப் பெற்றுள்ளது.