அரசியல் பேச வரவில்லை…., மாணவர்களுக்கு இப்போதைக்கு அரசியல் தேவையில்லை – முதல்வர் விஜய்!

சென்னை நீலாங்கரையில் தமிழக வெற்றிக் கழகம் சார்பில் மாணவர்களுக்கு கல்வி விருது வழங்கும் விழா இன்று (நவம்பர் 4) நடைபெற்றது. இந்த விழாவில் தமிழக முதலமைச்சர் சி. ஜோசப் விஜய் கலந்துகொண்டு மாணவர்களுக்கு விருதுகளை வழங்கி உரையாற்றினார்.

அப்போது பேசிய அவர், “நான் இங்கு முதலமைச்சராக வரவில்லை; எப்போதும்போல உங்கள் அண்ணனாக வந்துள்ளேன். இந்த மேடைக்கு வலுவான அடித்தளமாக இருப்பது மாணவர்களாகிய நீங்கள்தான். நம் வாழ்வின் ஊக்க சக்தியே மாணவர்கள்தான்” என்று தெரிவித்தார்.

மேலும், “நான் அரசியல் பேச வந்துள்ளதாக நினைக்க வேண்டாம். ஓட்டு கேட்கவோ, கட்சியைப் பற்றிப் பேசவோ இங்கு வரவில்லை. இப்போதைக்கு உங்களுக்கு அரசியல் தேவையில்லை. உங்களுடைய இலக்குகளை நோக்கி முயற்சி செய்யுங்கள். முதலில் குடும்பத்துக்கு முக்கியத்துவம் கொடுங்கள். அதன்பிறகு சமூகத்தைப் பற்றி சிந்தியுங்கள். இந்தச் சமூகம் உங்களை நம்பித்தான் உள்ளது. தமிழ்நாடும் உங்களை நம்பியுள்ளது” என்று மாணவர்களுக்கு அறிவுரை வழங்கினார்.

தொடர்ந்து பேசிய அவர், மாணவர்கள் தங்களுக்கென தனித்துவமான அடையாளத்தை உருவாக்கிக்கொள்ள வேண்டும் என்றும், வாழ்க்கையில் பல தடைகள் வந்தாலும் அவற்றைக் கடந்து முன்னேற வேண்டும் என்றும் கூறினார். நம்பிக்கை இருந்தால் வெற்றி நிச்சயம் என்றும் தெரிவித்தார்.

மேலும், மாணவர்கள் லஞ்சம் மற்றும் போதைப்பொருட்களின் பக்கம் சென்றுவிடக் கூடாது என்றும், எந்தத் தவறான பழக்கத்திற்கும் அடிமையாகாமல் தங்களது எதிர்காலத்தில் கவனம் செலுத்த வேண்டும் என்றும் அறிவுறுத்தினார்.

இறுதியாக, “உங்களுடன் நான் இருக்கிறேன்; என்னுடன் நீங்கள் இருக்கிறீர்கள்” என்று மாணவர்களிடம் தெரிவித்தார்.