மும்பையில் அதிர்ச்சி: 17 குழந்தைகளை பணய கைதிகளாக கடத்திய நபர் என்கவுன்ட்டரில் சுட்டுக்கொலை
மும்பை: மும்பையின் போவை (Powai) பகுதியில் வியாழக்கிழமை நடைபெற்ற அதிர்ச்சிகரமான சம்பவம் ஒன்று நகரத்தை உலுக்கியது. “ஆர்.ஏ. ஸ்டூடியோ” (RA Studios) எனப்படும் நடிப்பு பயிற்சி நிலையத்தில் 15 முதல் 20 குழந்தைகள் வரை கடத்தப்பட்டு சிறைபிடிக்கப்பட்டதாக தகவல் வெளியாகியுள்ளது. நடிப்பு வகுப்புகளுக்காக வந்திருந்த குழந்தைகள் சிலர் ஜன்னல் வழியே வெளியே பார்த்துக் கொண்டிருந்த காட்சிகள் பரபரப்பை ஏற்படுத்த, கவலைக்கிடமான பெற்றோர்கள் ஸ்டூடியோவின் வெளியே திரண்டனர்.
இந்த சம்பவத்தில் குற்றவாளியாக அடையாளம் காணப்பட்டவர் ரோஹித் ஆர்யா (Rohit Arya). அவர் குறைந்தது 17 குழந்தைகளை சிறைபிடித்திருந்ததாக போலீஸ் தெரிவித்துள்ளது. மும்பை போலீசார் உடனடியாக நடவடிக்கை எடுத்ததால் அனைத்து குழந்தைகளும் பாதுகாப்பாக மீட்கப்பட்டு அவர்களின் பெற்றோரிடம் ஒப்படைக்கப்பட்டனர்.
சம்பவத்தின் போது ரோஹித் ஆர்யா ஒரு வீடியோ வெளியிட்டார். அதில், “சிலருடன் பேச விரும்புகிறேன், அவர்கள் பேசவில்லை என்றால் நான் இங்கே எல்லாவற்றையும் எரித்து விடுவேன். எனக்கும், குழந்தைகளுக்கும் ஆபத்து ஏற்படும்,” என்று கூறியிருந்தார். மேலும், “நான் பயங்கரவாதி அல்ல, பணம் கேட்கவில்லை. எனக்கு தேவையானது நீதி மட்டும். எனது மனதில் சில கேள்விகள் உள்ளன; அதற்கான பதில்களைவே நான் தேடுகிறேன்,” என்றும் கூறினார்.
அவர் வீடியோவில் மிகுந்த மனஅழுத்தத்துடன் தோன்றினார். போலீசார் தெரிவித்ததாவது: “அவருக்கு மனநிலை பிரச்சனை இருந்தது போல தெரிகிறது. தகவல் வந்தவுடன் நாங்கள் உடனடியாக கட்டிடத்தைச் சூழ்ந்தோம். எங்கள் முதல் முன்னுரிமை குழந்தைகளின் பாதுகாப்பே,” என அதிகாரி ஒருவர் கூறினார்.
இந்த சம்பவம் மதியம் 1.45 மணியளவில் நடந்துள்ளது. இதன்பின்பு, போலீசார் தரப்பில் 2 மணி நேரத்திற்கும் மேலாக அவருடன் பேச்சுவார்த்தை நடத்தப்பட்டது. ஆனால், குழந்தைகளை விடுவிக்க அவர் மறுத்து விட்டார். இதனால், போலீசார் அதிரடியாக கழிவறை வழியே உள்ளே நுழைந்தனர். பயந்து போய் இருந்த குழந்தைகளையும் பாதுகாப்பாக மீட்டனர். இந்நிலையில், அந்த நபர் என்கவுன்ட்டரில் சுட்டுக்கொல்லப்பட்டு உள்ளார்.
