ஆந்திராவில் கோவில் கூட்ட நெரிசல் விபத்து: குழந்தைகள் உட்பட 9 பேர் உயிரிழப்பு!
ஆந்திரா மாநிலம் ஸ்ரீகாகுளம் மாவட்டம், காசிபுக்கா பகுதியில் அமைந்துள்ள ஸ்ரீ வெங்கடேஷ்வரா சுவாமி கோவிலில் இன்று காலை ஏற்பட்ட கூட்ட நெரிசலில் குழந்தைகள் உட்பட 9 பேர் உயிரிழந்துள்ளனர்.
பிரபலமான இந்த கோவில் தினமும் ஆயிரக்கணக்கான பக்தர்களை வரவேற்கிறது. இன்று ஏகாதசி நாளையொட்டி வழக்கத்தை விட அதிகமான பக்தர்கள் தரிசனம் செய்ய வந்ததால், கோவிலின் உள் பகுதிகளில் கடும் நெரிசல் ஏற்பட்டது.
இந்த திடீர் நெரிசலில் பலர் மிதிக்கப்பட்டு காயமடைந்தனர். இதில் பெண்கள் மற்றும் குழந்தைகள் உட்பட 9 பேர் உயிரிழந்ததாக ஆரம்ப தகவல்கள் தெரிவிக்கின்றன.
காயமடைந்தவர்கள் உடனடியாக மீட்கப்பட்டு அருகிலுள்ள அரசு மருத்துவமனைக்கு கொண்டு செல்லப்பட்டு சிகிச்சை அளிக்கப்பட்டு வருகிறது. அதிகாரிகள் தெரிவித்ததாவது, உயிரிழப்புகள் மேலும் அதிகரிக்கும் வாய்ப்பு இருப்பதாக தெரிவித்துள்ளனர்.
சம்பவம் நடைபெற்ற சில மணி நேரங்களிலேயே மாநில வேளாண் அமைச்சர் கே. அச்சன்நாயுடு சம்பவ இடத்துக்கு சென்று நிலைமையை நேரில் ஆய்வு செய்தார். மீட்புப் பணிகள் தீவிரமாக நடைபெற்று வருகின்றன.
இந்த துயரச் சம்பவத்திற்கு முதல்வர் சந்திரபாபு நாயுடு ஆழ்ந்த இரங்கல் தெரிவித்து, உயிரிழந்தோரின் குடும்பங்களுக்கு அரசு சார்பில் ஆறுதல் நிதி வழங்கப்படும் என்றும் அறிவித்துள்ளார்.
இந்த துயரச் சம்பவம் கோவிலைச் சுற்றியுள்ள பகுதிகளில் பெரும் சோகத்தை ஏற்படுத்தியுள்ளது. சமூக வலைதளங்களில் மக்களும், அரசியல் தலைவர்களும் உயிரிழந்தோரின் குடும்பங்களுக்கு இரங்கல் தெரிவித்து வருகின்றனர்.

