புதுச்சேரியில் ரூ.30 லட்சம் மோசடி வழக்கு – குற்றவாளிகளுக்கு 5 மாத சிறைத்தண்டனை
புதுச்சேரி:
பிரபல கட்டுமான நிறுவனத்தின் பெயரில் போலியாக விளம்பரம் செய்து, ஒப்பந்ததாரரிடம் ரூ.30 லட்சம் மோசடி செய்த வழக்கில் குற்றவாளிகளுக்கு ஐந்து மாத சிறைத்தண்டனையும், தலா ரூ.20,000 அபராதமும் விதித்து புதுச்சேரி நீதிமன்றம் தீர்ப்பு வழங்கியுள்ளது.
புதுச்சேரியைச் சேர்ந்த கட்டுமான ஒப்பந்ததாரர் சேதுராமன், தனியார் நிறுவனத்தின் பெயரில் Facebook-ல் வெளியான TMT கம்பிகள் பற்றிய விளம்பரத்தை நம்பி, மொத்தம் ரூ.30,97,000 பணத்தை செலுத்தி ஆர்டர் செய்துள்ளார். ஆனால், கம்பிகள் கிடைக்காததால் அவர் சைபர் கிரைம் காவல்துறையில் புகார் அளித்தார்.
வழக்கு தொடர்பாக சைபர் கிரைம் போலீசார் நடத்திய விசாரணையில், மோசடியில் ஈடுபட்ட ஐந்து பேர் கைது செய்யப்பட்டனர். விசாரணை முடிவில், நீதிமன்றம் அவர்களுக்கு ஐந்து மாத சிறைத் தண்டனை மற்றும் தலா ரூ.20,000 அபராதம் விதித்து தீர்ப்பு வழங்கியது.
இந்த தீர்ப்பு, ஆன்லைன் மோசடிகளுக்கு எதிராக கடுமையான எச்சரிக்கையாக கருதப்படுகிறது.
