ஜடேஜாவை ஏன் விற்றார்கள்? – மனம் திறந்து பேசிய CSK நிர்வாக இயக்குநர்

சிஎஸ்கே அணியின் முக்கிய வீரரான ரவீந்திர ஜடேஜா மற்றும் சாம் கரணை விற்று, அதற்குப் பதிலாக சஞ்சு சாம்சனை அணியில் சேர்த்தது குறித்து ரசிகர்கள் பலர் கேள்வி எழுப்பி வந்த நிலையில், CSK நிர்வாக இயக்குநர் காசி விஸ்வநாதன் இதுகுறித்து வீடியோ ஒன்றை வெளியிட்டு விளக்கம் அளித்துள்ளார்.

“CSK எடுத்த மிகவும் கடினமான முடிவு…”

வீடியோவில் அவர் கூறியதாவது:

“ஜடேஜாவை விற்பது CSK வரலாற்றில் மிகக் கடினமான முடிவுகளில் ஒன்று. 2012 முதல் அணியின் முக்கிய தூணாக விளங்கிய ஜடேஜா, 2023 IPL கோப்பை வெல்ல முக்கிய காரணமானவர்.” “ஆனால் அணிக்கு தற்போது மாற்றங்கள் தேவையான கட்டத்தில் இருக்கிறோம். வரும் இரண்டு ஆண்டுகளுக்குள் அணியை புதுப்பிக்க வேண்டிய அவசர நிலை உள்ளது.”

சஞ்சு சாம்சனை எடுத்த பின்னணி

விஸ்வநாதன் மேலும் கூறியதாவது:

ராஜஸ்தான் ராயல்ஸிலிருந்து சஞ்சு சாம்சனை பெற CSK தனது இரண்டு முக்கிய ஆல் ரவுண்டர்களான ஜடேஜா, சாம் கரணை டிரேடிங் முறையில் விற்றுள்ளது. மினி ஏலத்தில் தரமான இந்திய டாப் ஆர்டர் பேட்ஸ்மேன் இல்லாததால், டிரேடிங் வழியைத் தேர்ந்தெடுக்க வேண்டிய சூழ்நிலை ஏற்பட்டது. இது முழுக்க முழுக்க வீரர்கள் ஒப்புதல் அளித்துப் பிறகுதான் நடந்த மாற்றம்.

ரசிகர்களின் வருத்தத்தை புரிந்துகொள்ளும் CSK

“ஜடேஜாவை நேசிக்கும் ரசிகர்கள் ஏமாற்றமடைவார்கள் என்பதை நாங்கள் புரிந்துகொள்கிறோம். ஆனால் அணியின் எதிர்காலத்தை கட்டமைக்க சில கடின முடிவுகளை எடுக்க வேண்டிய கட்டாயம் ஏற்பட்டது,” என்று அவர் தெரிவித்துள்ளார்.

CSK-யின் அடுத்த கட்ட திட்டம்

ஜடேஜா, சாம் கரண் போன்ற அனுபவம் வாய்ந்த வீரர்கள் வெள்ளை பந்து கிரிக்கெட்டின் இறுதி கட்டத்தை நோக்கி வரும் நிலையில், அடுத்த இரண்டு ஆண்டுகளில் அணியை புதுப்பித்து ஒரு வலுவான அணியாக உருவாக்குவதுதான் CSK-யின் நோக்கம் என நிர்வாகம் தெரிவித்துள்ளது.