நம்மை பிடிக்காத ஒருவரைப் பற்றியே ஏன் அடிக்கடி நினைக்கிறோம்? இதுதான் காரணம்!
“அவரை எனக்கு பிடிக்கவே பிடிக்காது… ஆனா ஏன் அவரைப் பற்றியே அடிக்கடி நினைக்கிறேன்?” என்ற கேள்வி பலருக்கும் இருக்கும். ஒருவரை விரும்பாமல் இருந்தாலும், அவரைப் பற்றிய நினைவுகள் மீண்டும் மீண்டும் மனதில் தோன்றுவதற்கு நமது மூளையின் செயல்பாடுகளே முக்கிய காரணமாக இருக்கலாம்.
குறிப்பாக, அந்த நபருடன் ஏற்பட்ட ஒரு மோசமான அனுபவம், சண்டை, அவமானம் அல்லது மனதை பாதித்த சம்பவம் இருந்தால், அதை மூளை எளிதில் மறந்துவிடாது. உணர்வுபூர்வமாக தாக்கத்தை ஏற்படுத்திய சம்பவங்களுக்கு நமது மூளை அதிக முக்கியத்துவம் கொடுக்கிறது. அதனால் அந்த நபரை நினைக்க வேண்டாம் என்று முயற்சி செய்யும்போதும், அதே நினைவு மீண்டும் தோன்றலாம்.
மேலும், “அவரைப் பற்றி நினைக்கவே கூடாது” என்று நம்மை நாமே கட்டுப்படுத்த முயற்சிப்பதும் சில நேரங்களில் எதிர்மறையான விளைவை ஏற்படுத்தும். ஒரு குறிப்பிட்ட விஷயத்தை நினைக்கக்கூடாது என்று தொடர்ந்து நினைப்பதே, அந்த விஷயத்தை மனதில் மீண்டும் கொண்டு வரலாம்.
அதேபோல், அந்த நபரிடம் சொல்லாமல் விட்ட வார்த்தைகள், முடிவடையாத பிரச்சனைகள் அல்லது கிடைக்காத பதில்கள் இருந்தாலும், மனதில் அந்த சம்பவத்தை மீண்டும் மீண்டும் நினைத்து பார்க்கும் நிலை ஏற்படலாம்.
அதனால் ஒருவரைப் பற்றி அடிக்கடி நினைப்பது, அவரை நாம் விரும்புகிறோம் என்று அவசியமில்லை. சில நேரங்களில் அந்த நபர் ஏற்படுத்திய உணர்வு அல்லது முடிவடையாத ஒரு அனுபவம்தான் நம் நினைவில் தொடர்ந்து இடம்பிடித்திருக்கலாம்.
