2027ஆம் ஆண்டுக்குள் அனைத்து மாநிலத் தலைநகரங்களிலும் FRRO அலுவலகங்கள் – மத்திய அரசு திட்டம்!

இந்தியாவில் வெளிநாட்டினருக்கான குடியேற்றம் மற்றும் விசா தொடர்பான சேவைகளை எளிதாக்கும் நோக்கில், 2027ஆம் ஆண்டுக்குள் அனைத்து மாநிலத் தலைநகரங்களிலும் வெளிநாட்டினர் பிராந்தியப் பதிவு அலுவலகங்களை (FRRO) அமைக்க மத்திய அரசு திட்டமிட்டுள்ளது.

இதற்கான உத்தரவை மத்திய உள்துறை அமைச்சர் அமித் ஷா பிறப்பித்துள்ளார். இந்தியாவுக்கு சுற்றுலா, மருத்துவம் மற்றும் கல்வி உள்ளிட்ட தேவைகளுக்காக வருகை தரும் வெளிநாட்டினரின் எண்ணிக்கை அதிகரித்து வருவதால், இந்த நடவடிக்கை மேற்கொள்ளப்படுகிறது.

தற்போது இந்தியாவில் மொத்தம் 20 FRRO அலுவலகங்கள் செயல்பட்டு வருகின்றன. 2025ஆம் ஆண்டு ஜெய்ப்பூர், சண்டிகர், கவுகாத்தி ஆகிய நகரங்களிலும், 2026ஆம் ஆண்டு மிசோரம் மாநிலத்தின் ஐஸ்வால் மற்றும் ஆந்திரப் பிரதேசத்தின் அமராவதியிலும் புதிய அலுவலகங்கள் அமைக்கப்பட்டுள்ளன.

மேலும், நாகாலாந்தின் கோஹிமா, திரிபுராவின் அகர்தலா, ஒடிசாவின் புவனேஸ்வர் ஆகிய நகரங்களிலும் புதிய அலுவலகங்கள் அறிவிக்கப்பட்டுள்ளன. இதன் மூலம் வெளிநாட்டினர் விசா நீட்டிப்பு, விசா வகை மாற்றம், பதிவு சான்றிதழ் பெறுதல், குடியிருப்பு அனுமதி மற்றும் வெளியேறுவதற்கான அனுமதி போன்ற சேவைகளை எளிதாகப் பெற முடியும்.

தற்போது பீகார், கோவா, இமாச்சலப் பிரதேசம், ஜார்க்கண்ட், மத்தியப் பிரதேசம், உத்தரகாண்ட், அருணாச்சலப் பிரதேசம், மணிப்பூர் மற்றும் மேகாலயா ஆகிய 9 மாநிலங்களில் FRRO அலுவலகங்களை அமைப்பதற்கான நடவடிக்கைகள் மேற்கொள்ளப்பட்டு வருகின்றன.

குடியேற்றம் மற்றும் வெளிநாட்டினர் தொடர்பான நான்கு பழைய சட்டங்களை ஒருங்கிணைத்து உருவாக்கப்பட்ட குடியேற்றம் மற்றும் வெளிநாட்டினர் சட்டம், 2025-ன் கீழ் இந்த விரிவாக்கம் மேற்கொள்ளப்படுகிறது. இதன் மூலம் வெளிநாட்டினருக்கான சேவைகளை மேம்படுத்துவதுடன், குடியேற்ற விதிமுறைகளைக் கண்காணிப்பதும் எளிதாகும் என மத்திய அரசு தெரிவித்துள்ளது.