வங்கதேசத்தில் தொழிலாளர் போராட்டம் – நிலவரத்தை உன்னிப்பாகக் கண்காணிக்கும் இந்தியா!

வங்கதேசத்தில் ஊதிய உயர்வு கோரி ஆடைத் தொழிற்சாலை தொழிலாளர்கள் நடத்தி வரும் போராட்டங்களை இந்தியா உன்னிப்பாகக் கண்காணித்து வருகிறது. இதனை இந்திய வெளியுறவுத்துறை அமைச்சக செய்தித் தொடர்பாளர் ரந்தீர் ஜெய்ஸ்வால் நவம்பர் 3ஆம் தேதி தெரிவித்துள்ளார்.

வங்கதேசத்தில் சுமார் 4,000 பதிவு செய்யப்பட்ட ஆடைத் தொழிற்சாலைகளில், தொழிலாளர்களின் போராட்டம் காரணமாக 670 தொழிற்சாலைகள் மூடப்பட்டுள்ளதாகத் தகவல் வெளியாகியுள்ளது. டாக்கா, காசிபூர் உள்ளிட்ட பகுதிகளில் போராட்டங்கள் தீவிரமடைந்துள்ளன. தொழிலாளர்கள் தங்களது மாதாந்திர குறைந்தபட்ச ஊதியத்தை உயர்த்தக் கோரி வருகின்றனர்.

இதற்கிடையே, இந்தியா – வங்கதேசம் இடையிலான கங்கை நதி நீர் பங்கீட்டு ஒப்பந்தம் குறித்தும் செய்தியாளர்கள் கேள்வி எழுப்பினர். இதற்கு பதிலளித்த ரந்தீர் ஜெய்ஸ்வால், இரு நாடுகளுக்கும் இடையே உள்ள கூட்டுப் நதிகள் ஆணையம் (Joint Rivers Commission) மூலம் எல்லை தாண்டி பாயும் நதிகள் தொடர்பான பிரச்சினைகள் குறித்து விவாதிக்கப்படுவதாகத் தெரிவித்தார்.

கடந்த 1996ஆம் ஆண்டு டிசம்பர் மாதம் இந்தியா மற்றும் வங்கதேசம் இடையே கங்கை நதி நீர் பங்கீட்டு ஒப்பந்தம் கையெழுத்தானது. இந்த ஒப்பந்தம் 2026ஆம் ஆண்டுடன் காலாவதியாக உள்ளதால், அதன் புதுப்பிப்பு தொடர்பான பேச்சுவார்த்தைகள் முக்கியத்துவம் பெற்றுள்ளன.

மேலும், வங்கதேச பிரதமர் தாரிக் ரஹ்மானுக்கு இந்தியா வருமாறு அழைப்பு விடுக்கப்பட்டுள்ளதாகவும் வெளியுறவுத்துறை தெரிவித்துள்ளது.