ஆட்சியை பிடிப்பது யார்..? பீகாரில் நாளை வாக்கு எண்ணிக்கை!

பீகார்:

பீகார் சட்டசபைத் தேர்தல் இரண்டு கட்டங்களாக நடைபெற்றது. மொத்தம் 243 தொகுதிகளைக் கொண்ட மாநிலத்தில், முதல் கட்டமாக கடந்த 6ஆம் தேதி 121 தொகுதிகளில் வாக்குப்பதிவு நடந்தது. இதில் 65.09% வாக்குகள் பதிவாகின.

அதனைத் தொடர்ந்து, மீதமுள்ள 122 தொகுதிகளுக்கான வாக்குப்பதிவு இரண்டாம் கட்டமாக நேற்று முன்தினம் நடைபெற்றது. காலை 7 மணிக்கு தொடங்கிய வாக்குப்பதிவு மாலை 6 மணிவரை விறுவிறுப்பாக நடைபெற்றது. இதில் 69% வாக்குகள் பதிவாகியுள்ளன.

முக்கியமாக, முஸ்லிம் மக்கள் பெரும்பான்மையாக உள்ள கிஷன்கஞ்ச் மாவட்டத்தில் அதிகபட்சமாக 76.23% வாக்குகள் பதிவாகியுள்ளன.

இந்நிலையில், பீகார் சட்டசபைத் தேர்தலில் பதிவான வாக்குகள் நாளை (வெள்ளிக்கிழமை) காலை 8 மணிக்கு எண்ணத் தொடங்கப்படுகின்றன. முதலில் தபால் வாக்குகள் எண்ணப்பட்டு, அதன் பின் மின்னணு வாக்குப் பதிவுகள் (EVM) திறக்கப்படும்.

மொத்தம் 243 தொகுதிகளில் ஆட்சியை அமைக்க குறைந்தபட்சம் 122 இடங்கள் தேவைப்படுகிறது. எனவே, பீகாரில் ஆட்சியை பிடிப்பது யார் என்பது நாளை பகல் 12 மணிக்குள் வெளிப்படும் என எதிர்பார்க்கப்படுகிறது.

தேர்தல் பிந்தைய கருத்துக்கணிப்புகள், பா.ஜ.க தலைமையிலான தேசிய ஜனநாயக கூட்டணி (NDA) மீண்டும் ஆட்சியை பிடிக்கும் வாய்ப்பு இருப்பதாகக் கூறுகின்றன.