பிக் பாஸ் நிகழ்ச்சியில் ஜேசன் சஞ்சய்.. நாகார்ஜுனாவுடன் கலந்துரையாடல்!
தமிழக முதலமைச்சர் விஜய்யின் மகனும், இயக்குநருமான ஜேசன் சஞ்சய், தெலுங்கு பிக் பாஸ் சீசன் 10 நிகழ்ச்சியில் சிறப்பு விருந்தினராக பங்கேற்றுள்ளார். அவருடன், அவர் இயக்கியுள்ள ‘சிக்மா’ திரைப்படத்தின் நாயகன் சந்தீப் கிஷனும் நிகழ்ச்சியில் கலந்துகொண்டார்.
‘சிக்மா’ திரைப்படம் அக்டோபர் 2ஆம் தேதி திரையரங்குகளில் வெளியாக உள்ள நிலையில், படத்தின் புரமோஷன் பணிகள் தீவிரமாக நடைபெற்று வருகின்றன. அதன் ஒரு பகுதியாகவே ஜேசன் சஞ்சய் மற்றும் சந்தீப் கிஷன் தெலுங்கு பிக் பாஸ் நிகழ்ச்சியில் கலந்துகொண்டுள்ளனர்.
நிகழ்ச்சியின் தொகுப்பாளரான நடிகர் நாகார்ஜுனா, ஜேசன் சஞ்சய் மற்றும் சந்தீப் கிஷனை வரவேற்று அவர்களுடன் கலந்துரையாடினார். அப்போது ஜேசன் சஞ்சயிடம் அவரது திரையுலகப் பயணம் குறித்தும் ‘சிக்மா’ திரைப்படம் குறித்தும் பேசினார்.
மேலும், தெலுங்கு ரசிகர்கள் நடிகர் விஜய்க்கு தொடர்ந்து அளித்து வரும் வரவேற்பை குறிப்பிட்ட நாகார்ஜுனா, அதே அன்பு ஜேசன் சஞ்சய்க்கும் அவரது ‘சிக்மா’ படத்திற்கும் கிடைக்க வேண்டும் என வாழ்த்து தெரிவித்தார். இதற்கு ஜேசன் சஞ்சய் நன்றி தெரிவித்தார்.
தொடர்ந்து பிக் பாஸ் போட்டியாளர்களுடனும் ஜேசன் சஞ்சய் கலந்துரையாடினார். போட்டியாளர்களில் ஒருவரான திரிகுனின் திரைப்படங்களை பார்த்துள்ளதாகவும், அவரது நடிப்பு தனக்கு பிடிக்கும் என்றும் அவர் தெரிவித்ததாக தகவல்கள் வெளியாகியுள்ளன. இதையடுத்து திரிகுன், ஜேசன் சஞ்சய்க்கு நன்றி தெரிவித்து ‘சிக்மா’ திரைப்படம் வெற்றி பெற வாழ்த்து கூறினார்.
ஜேசன் சஞ்சய் இயக்கத்தில் உருவாகியுள்ள ‘சிக்மா’ திரைப்படத்தில் சந்தீப் கிஷன் கதாநாயகனாக நடித்துள்ளார். ஃபரியா அப்துல்லா, சம்பத் ராஜ், சிவ பண்டிட் உள்ளிட்டோரும் முக்கிய கதாபாத்திரங்களில் நடித்துள்ளனர். இப்படம் அக்டோபர் 2ஆம் தேதி வெளியாக உள்ளது.
இந்நிலையில், தெலுங்கு பிக் பாஸ் நிகழ்ச்சியில் ஜேசன் சஞ்சய் பங்கேற்றது, ‘சிக்மா’ திரைப்படத்தின் தெலுங்கு மாநிலங்களுக்கான புரமோஷனிலும் கவனம் பெற்றுள்ளது.
