மழைக்கு தயாராகும் தமிழ்நாடு.. சென்னையில் இன்று மாலை மழை பெய்யுமா?

தமிழ்நாட்டில் இன்று (செப்டம்பர் 30) பல்வேறு பகுதிகளில் மழைக்கு வாய்ப்புள்ளதாக சென்னை வானிலை ஆய்வு மையம் தெரிவித்துள்ளது. குறிப்பாக சில மாவட்டங்களில் கனமழையும், இடியுடன் கூடிய மழையும் பெய்யக்கூடும் என எச்சரிக்கை விடுக்கப்பட்டுள்ளது.

இன்று நீலகிரி, ஈரோடு, தருமபுரி, கிருஷ்ணகிரி உள்ளிட்ட மாவட்டங்களில் ஓரிரு இடங்களில் கனமழை பெய்ய வாய்ப்புள்ளது. மேலும் மேற்கு தொடர்ச்சி மலையை ஒட்டிய பகுதிகள் மற்றும் சில உள் மாவட்டங்களில் மிதமான மழையும், தமிழகத்தின் பிற பகுதிகளில் லேசானது முதல் மிதமான மழையும் பெய்யக்கூடும்.

மழையின்போது சில இடங்களில் இடியுடன் கூடிய பலத்த காற்றும் வீசக்கூடும் என்பதால் பொதுமக்கள் எச்சரிக்கையுடன் இருக்க அறிவுறுத்தப்பட்டுள்ளனர். சென்னையில் மழை பெய்யுமா?

சென்னையைப் பொறுத்தவரை, இன்று வானம் ஓரளவு மேகமூட்டத்துடன் காணப்படலாம். நகரின் சில பகுதிகளில் குறிப்பாக பிற்பகல் மற்றும் மாலை நேரங்களில் மிதமான மழைக்கு வாய்ப்பு இருப்பதாக வானிலை முன்னறிவிப்புகள் தெரிவிக்கின்றன.

இதனால் மாலை நேரத்தில் அலுவலகம் மற்றும் பள்ளி, கல்லூரிகளில் இருந்து வீடு திரும்பும் பொதுமக்கள் மழையை எதிர்கொள்ள நேரிடலாம். திடீர் மழை காரணமாக சாலைகளில் போக்குவரத்து நெரிசலும் ஏற்பட வாய்ப்புள்ளதால், வாகன ஓட்டிகள் முன்னெச்சரிக்கையுடன் பயணிப்பது நல்லது.

தொடர்ந்து அக்டோபர் 1-ம் தேதியும் தமிழ்நாட்டில் சில பகுதிகளில் கனமழை பெய்ய வாய்ப்பு உள்ளதாக IMD தெரிவித்துள்ளது.