உஜ்ஜைனில் சாலை பணி.. எதிர்பாராதவிதமாக சேதமடைந்த சாஹி மசூதி!

மத்தியப் பிரதேசத்தின் உஜ்ஜைனில் சாலை விரிவாக்கப் பணியின்போது சாஹி மசூதியின் ஒரு பகுதி சேதமடைந்துள்ளது. சிம்ஹஸ்தா கும்பமேளாவை முன்னிட்டு, கன்தால் சந்திப்பு முதல் கோபால் மந்திர் வரையிலான சாலையை விரிவுபடுத்தும் பணிகள் நடைபெற்று வருகின்றன.

சாலை விரிவாக்கப் பணிக்காக, சத்திரி சவுக் பகுதியில் சாலையின் பாதையில் அமைந்துள்ள மசூதியின் ஒரு பகுதியை அகற்றும் பணி நடைபெற்றது. இந்தப் பணியின்போது மினாரின் ஒரு பகுதி எதிர்பாராதவிதமாக மசூதியின் கூரை மீது விழுந்ததில் கட்டிடத்தின் ஒரு பகுதி சேதமடைந்ததாக அதிகாரிகள் தெரிவித்துள்ளனர்.

இந்த சம்பவத்தில் யாருக்கும் காயம் ஏற்படவில்லை என்றும், உயிரிழப்பு எதுவும் இல்லை என்றும் உஜ்ஜைன் மாவட்ட ஆட்சியர் ரோஷன் குமார் சிங் தெரிவித்துள்ளார். சம்பவம் தொடர்பாக பொதுமக்கள் வதந்திகளை நம்ப வேண்டாம் என்றும், அதிகாரப்பூர்வ தகவல்களை மட்டுமே நம்ப வேண்டும் என்றும் அவர் கேட்டுக்கொண்டுள்ளார்.

மசூதியின் சாலை விரிவாக்கப் பகுதியில் உள்ள பகுதியை அகற்றும் பணி, நிர்வாகத்துடன் கலந்தாலோசித்து சமூகத்தினரின் ஒத்துழைப்புடன் நடைபெற்று வந்ததாக அதிகாரிகள் தெரிவித்துள்ளனர். சாலை விரிவாக்கத் திட்டத்தின் ஒரு பகுதியாக பல்வேறு கட்டிடங்கள் பாதிக்கப்படுகின்றன.

இந்த விவகாரம் தொடர்பாக முன்னதாகவே உஜ்ஜைனில் பதற்றமான சூழல் ஏற்பட்டிருந்தது. மசூதியின் ஒரு பகுதியை அகற்றுவதற்கு எதிர்ப்பு தெரிவித்து போராட்டங்கள் நடைபெற்ற நிலையில், செப்டம்பர் 28-ம் தேதி கல் வீச்சு உள்ளிட்ட வன்முறை சம்பவங்களும் பதிவாகின. பின்னர், மசூதி நிர்வாகம் மற்றும் உள்ளூர் நிர்வாகத்துக்கு இடையே ஏற்பட்ட உடன்பாட்டின் அடிப்படையில் அகற்றும் பணி தொடர்ந்தது.

தற்போது சம்பவ இடத்தில் அதிகாரிகள் கண்காணிப்பை தீவிரப்படுத்தியுள்ளனர். சிம்ஹஸ்தா 2028-க்கான சாலை விரிவாக்கப் பணிகளுக்கு மத்தியில் ஏற்பட்டுள்ள இந்த சம்பவம் மீண்டும் கவனம் பெற்றுள்ளது.