TNPSC குரூப் 4-ல் 6,574 காலியிடங்கள்.. விண்ணப்பிக்க இதுதான் கடைசி தேதி!

தமிழ்நாடு அரசுப் பணியாளர் தேர்வாணையம் (TNPSC) சார்பில் 2026-ம் ஆண்டுக்கான குரூப்-4 தேர்வு அறிவிப்பு வெளியாகியுள்ளது. இதன்படி, தமிழக அரசின் பல்வேறு துறைகள் மற்றும் நிறுவனங்களில் உள்ள 6,574 காலிப் பணியிடங்கள் நிரப்பப்பட உள்ளன. மொத்தம் 46 வகையான பதவிகளுக்கு இந்த ஆட்சேர்ப்பு நடைபெறுகிறது.

இதில் கிராம நிர்வாக அலுவலர் (VAO), இளநிலை உதவியாளர், தட்டச்சர், சுருக்கெழுத்து தட்டச்சர், பில் கலெக்டர், வருவாய் உதவியாளர், வனக்காவலர் உள்ளிட்ட பல்வேறு பணியிடங்கள் இடம்பெற்றுள்ளன. பெரும்பாலான பணியிடங்களுக்கு குறைந்தபட்ச கல்வித் தகுதியாக 10-ம் வகுப்பு தேர்ச்சி நிர்ணயிக்கப்பட்டுள்ளது. இருப்பினும், சில பதவிகளுக்கு கூடுதல் தொழில்நுட்பத் தகுதிகள் தேவைப்படுகின்றன.

முக்கிய தேதிகள்:

2026 அக்டோபர் 6-ம் தேதி முதல் ஆன்லைன் விண்ணப்பங்கள் தொடங்கியுள்ளன. விண்ணப்பிக்க நவம்பர் 5, 2026 கடைசி நாளாகும். அதன்பிறகு, விண்ணப்பங்களில் திருத்தம் செய்ய நவம்பர் 9 முதல் 11-ம் தேதி வரை Correction Window வழங்கப்பட்டுள்ளது. குரூப்-4 எழுத்துத் தேர்வு 2027 ஜனவரி 10-ம் தேதி நடைபெற உள்ளது.

இந்தத் தேர்வு OMR முறையில் நடைபெறும். மொத்தம் 200 கேள்விகளுக்கு 300 மதிப்பெண்கள் வழங்கப்படும். தமிழ் தகுதி மற்றும் மதிப்பெண் தேர்வில் 100 கேள்விகள் இடம்பெறும். மேலும், பொது அறிவில் 75 கேள்விகளும், திறனறிவு மற்றும் மனத்திறன் பகுதியில் 25 கேள்விகளும் இடம்பெறும். தேர்வு நேரம் 3 மணி நேரமாக நிர்ணயிக்கப்பட்டுள்ளது.

மேலும், சில பதவிகளுக்கு வயது வரம்பு, தொழில்நுட்பத் தகுதி, தட்டச்சு/சுருக்கெழுத்துத் தகுதி மற்றும் உடற்தகுதி போன்ற கூடுதல் நிபந்தனைகள் உள்ளன. குறிப்பாக வனக்காவலர் உள்ளிட்ட பணியிடங்களுக்கு தனிப்பட்ட உடற்தகுதி விதிமுறைகள் பொருந்தும். எனவே, விண்ணப்பிக்கும் முன்பு சம்பந்தப்பட்ட பதவிக்கான முழுமையான தகுதிகளை அதிகாரப்பூர்வ அறிவிப்பில் சரிபார்ப்பது அவசியம்.

ஏற்கனவே One Time Registration (OTR) செய்துள்ளவர்கள், அதே கணக்கைப் பயன்படுத்தி குரூப்-4 தேர்வுக்கு விண்ணப்பிக்கலாம். விண்ணப்பதாரர்கள் கடைசி தேதிக்காக காத்திருக்காமல் தேவையான ஆவணங்களுடன் விண்ணப்பிப்பது முக்கியம்.